قارئات الكفّ

الطائر المهاجر · 21-07-2019, 10:19 PM

قارئات الكفّ شوفن خطّ عمري = هو فيه امـل التقي ويّا الحبيبه
حبٍّ جمعنـا تـلاشى ليه مدري = من بعد هجره عسى ربي حسيبه
هاتن لي الزين راع الشال خمري= يقـرا لي الكف جعلي من نصيبه
وجتني تهادى وريـم البر حذري= يمشي حيـا ساترٍ وجهه وجيبه
يا برقع الزين قلي طـال صبري = ان كان ثغره مثل طرفه .. مصيبه!
مسكت يميني واحس النار تسري= ياسعد قـلبٍ كسب هذي طبيبه
من دون مدري نطقت الآه بدري= ما عبّرتني ولـو مني قـريبه
ردّيتهـا ثانيه والصـوت جهري= الا ووحـده تجي مثل الصويبه
قالت علامك ، سكت وبان قهري= قالت ترفق ترى (الصقها) غريبه
وش لون هالريم صقها ضاق صدري=الـزين ما يكتمل كـلٍ وعيبه
قـامت تأشر لهـا فالخط خطري = يمشي وياقف ابخطواتٍ رتيبه
وفالآخره يندفن في عرق يجري= للقلب يحمـل براده عن لهيبه
"عنـدك غـزالٍ تحب بكل طهري= لكنك اخطيت في حـق العريبه"
"درب الغـواني خـذك برٍ وبحري= ومن اشّرت لك تقول أنتي رهيبه"
"قلبك خضر لين طحت بكل يسري= بوحده لعوبٍ خذت مالك نهيبه"
"واليوم خطّك إذا تصحى وتدري = ينقـذك من شر ما تدري بغيبه"
ودعتهـا ذاهـلٍ لكـن فكـري= معهـا تعلـق وسمّعني هذيبه
قلت ارجع الها واصارحها بأمري= فالقلب يامر ولـزم اني اجيبه
لكنهـا اختفت فالحـظ عثـري = محدٍ عرف سكة الريم المهيبه
ورجعت بيتي حزين البال كدري = ويفتح لي الباب من دورت طيبه
قـارية الكف ما يكفيك سحري! = وش لون جيتي برجلك يالطليبه
قالت هلا بك يابو عيالي وصقري = مثّـلت دور الخبيره واللبـيبه
انقـاذ زوجي من التيّـار فخري= بحرالهوى من سبح به بان عيبه
حسيت ذنبي ولكن بعـد غدري= وانهرت مثل الطفل دمعه يجيبه
وشلون طاوعت نفس الشر دهري= والبدر عندي وانا سبّة مغيبه
الرجل طفـلٍ يغـرّه كل نضري = ومن دون تفكير ياقع بالمصيبه