مـاجــور يــامــن بـحــاسـيـسـه يـكـوكني

[عيد مشعل]

أسعد الله أوقاتكم بكل خير ومحبه

هذي قصيده مسنده علي من الشاعر نايف دكيم وردي عليها

ياعيد حالي براه العشـق واهلكنـي =واصبحت عايش مع العالـم بغيبوبـه
من نظرة(ن) بالعيون السـود بركنـي =ودوبه لمحني بعينـه ياولـد دوبـه
ياعيد تكفى بسرعـه عجـل ادركنـي =قدام لصبح بعيـن النـاس لعبوبـه
وش عاد لو قلت لـك حبـه تملكنـي =ونار المحبه بوسط القلـب مشبوبـه
اليا تحرك بوسـط السـوق حركنـي =وخلاني أسلك دروبن ماهـي دروبـه
حتى بحلمـي ونـوم الليـل شاركنـي =أكبر من الذنب وأعظم من عنا التوبه
يلعنك حب(ن) بعـز انسـان شككنـي =وخلاني انسـى معاريفـه وماجوبـه
من بعد ماراح عنـي مـن بيمسكنـي =عن فتنة الارض دام الحال مسلوبـه
حتى الجمارك يابـن عمـي تجمركنـي =والناس ياصاحبي بالعشـق منكوبـه
نكبـة زمانـي تولعـنـي وتتركـنـي =لجل المصاري عقوبه عشقي عقوبـه
بالمال تمـن معـي والفقـر منهكنـي =ياعيد راح الحبيـب لجل محبوبـه
بنـك الفلـس ياصحيبـي لويبنكـنـي =لا والله ألا بنيـت الفقـر مـن طوبـه
أصبحت أصيب الهدف من زاوية ركني =ياعيد وش حيلة إللي عرقلـه ثوبـه
لاصارعلـم المحـبـه دوم يربكـنـي =وبعد التصادم رجـع للكبـد لاهوبـه
العالـم الخارجـي بالحيـل شربكنـي =وكذاب من قال جاب البنـت بسلوبـه

وردي عليها قلت

ماجور يامن بحاسيسه يكوكني = أبياتهم يوم جتنا عجوبه عذوبه
وإن كان قصده يحيرني يشبكني = ترا بليهان له ماحكك جنوبه
بيوته لاجتكم فيها سحراً وسكني = وألا إنها من مناجم جتك مصبوبه
ويلي تبا الفزعه أنا من يفككني = وحالي من العشق منكسره ومرهوبه
وأبشر بفزعه لون العشق ضككني = ياحر يلي على المطلاع هدوبه
حب الشرف في دروب العز سلكني = وأخطبها يوم إنها ماهيب مخطوبه
وتجي المعونه لون الفقر تككني = وأرتاح من حب متلوي بعرقوبه
وذكرتني بصاحباً فالشوق حايكني = إللي منه شفت موتي نوبه ونوبه
ماشوف غيره لون غيره يفبّركني = وألا يمديني من غرشوبه برعبوبه
لاجيت قدامه لساني يلكلكني = ودقات قلبي مع الأفكار مضروبه
هو الوحيد إللي بكاني وضحكني = وهو الوحيد الذي محداً يبا ينوبه
وهو الوحيد الذي دايم يخزبكني = وأقعد أمول هجينيه ومسحوبه
ولوني أحاول أطلع منه بمكني = أروح منه ثم أرجع وأتجه صوبه
واهمي إللي معا خلي يعاركني = والروح من تعذيب الأحباب مشحوبه

وسلامتكم


الرجاء من المشرفين الكرام تنسيق القصيدتين

[داعي الشوق]

حجززززززززززززززززززززززززز

[حمود السكراني]

صحت السنتكم وسلم

بوحكم صوت وصدى رائعين

سلمتم

[محمد عبدالله البدراني]

بيوته لاجتكم فيها سحـراً وسكنـي


وألا يمديني من غرشوبه برعبوبـه


اخي عيد مشعل ارجو التأكد من الشطرين اعلاه


وسلمت ودمت



ولي عوده تليق



تحيتي وتقديري

[عبدالعزيز البليهد]

والله كلكم متشربكين بالهواء الله يعينكم

صح لسانك وصح لسان نايف

قوافي جميله وانا مع ملاحظات ناقدنا البدراني

[عبدالإله]

صح لسان الشاعر نايف

و صح لسانك يا مشعل

[وليدالبسطي]

صوت وصدى في قمة الروعه



تسلمون


اخوكم

وليدالبسطي

[عبدالله راشد الثويني]

صـوت وصدى لا يسعنا سوى الإنصات لهن والإستمتاع بهذه الروائع
صحّت ألسنتكم ولا هنتو يابعدي طامعين دائماً بجديدكم
تحيتي

[حي الضمير]

صح لسانه ولسانك ياعيد
وبيض الله وجيهكم
صوت وصدى عذبين

[سالم محمد اليامي]

احسنت سالاعر
وصح لسانك
ولاهنت

قاف وابيات وتمكن
ومعناااااااااا

حظر هنا
سالم اليامي