(مــابــاقــيٍ نـــوع)

[راشد فاروع]

السلام عليكم ورحمة الله وبركاته


كل عام وأنتم بخير

ياعيد يوم إنك من العصر تنذاع=فرحتك سنة دين والدين مزروع
لصدورنا من صغرنا خير مرباع=واللي غرس له زرع نافع ومنفوع
شيبان باقيهم على رؤوس الاصباع=ياليت لو منهم ملايين وجموع
وأنا ماقول الخير في وقتنا ضاع=واكبر دليل إن العلم فوق مرفوع
ماهوب بالأفضل كل من ذكره إيشاع=افضل بشر بالدين تابع ومتبوع
وأنا على السنه ماضيعت الأسناع=لكن من الايام ضايق وموجوع
عشت الزمن رحله وتشتيت ووجاع=ارتاح من مشروع وادخل بمشروع
ليت الفرح يقدر يغير بالأوضاع=ويزيح له هم" على القلب مطبوع
هم" حدا رجلي على كل مطلاع=اجر لي صوتٍ خفي غير مسموع
وجدي على اللي له بصدري تمتاع=وله في طواريه ابتسامات ودموع
اقرب من الانفاس لقفاص الأضلاع=وابعد على المشتاق من حبة الكوع
حسب اعتقادي جامع" كل الاطباع=الشين لا والزين ماباقيٍ نوع
اشوفه بعيني بحر شوق وأمَتاع=الخوف في الامواج والدرَ في القوع
تجوع له عيني وقلبي والأسماع=وشلون مدري مير انا ميتٍ جوع
عن ماتحب النفس مايفيد الإقناع=حتى لو تشوف الآمل فيه مقطوع
لا جابه الطاري له النفس تنصاع=وتسج مع طاريه غصبٍ بلا طوع

[الـزلـزال]

راشد فاروع

نص مميز ورائع وجميل
من شاعر عودنا على تميز حرفه الشعري
أبدعت وأمتعت شاعرنا رعاك الله
دمت بخير ودام لنا حرفك
صح لسانك ملايين ملايين
ولك فائق تحياتي وتقديري

[منيع]

ياسلام عليك
مبدع ومميز
تسلم اخي الكريم
تحياتي لكم

[عبدالعزيز العمار]

صح لسانك وجاد بيانك

رائعه بروعة حضورك الرائع

كل عام وانت بخير ومن العايدين والفايزين

[أحمد عوده الشامي]

صح لسانك

ولاهنت على الطرح

كل عام وانت بخير

[ماجد الراشد الهيري]

صح لسانك ياراشد وابداعك الجميل
طرق مدهش وقاف كايف ماشاء الله عليك
لاهنت ولاهان منطوقك الجزل

[بنت النور]

صح لسانك راشد وجاد بيان

لاهنت ولاهان منطوقك

تحياتي لك

[ابوجفين]

تعجز حروفي عن وصف روعة هذه الباذخه
صح لسانك
ولاهان راسك
تقبل ودي واحترامي

[البرجس]

للروعة جمالها هنا
صح لسانك مدد
ولاهنت
مع أطيب تحياتي

[الطائر المهاجر]

كتبت فأبدعت واجزلت
صح لسانك ولا هنت
تحياتي الطيبة