بشروا كل قاتل بالقتل بعد حين

الطائر المهاجر · 21-10-2011, 08:38 PM

بشروا كل قاتل بالقتل بعد حين = وبشروا كل طاغي فالنهايه قريبه
يمهل الله ولا يهمل وعينٍ بعين= ومن يظنه بمنجا فالله اللي يجيبه
قاهرين الشعوب بظلمهم حاكمين= ما تخافون ربٍ ما دريتوا بغيبه
كل شعبٍ ولو يصبر فربه يعين = ما يخليه لحظه للدعاء مستجيبه
لا تقولون حنا بالظلم جاهلين = لو بكم أي طيّب فالبطانه تعيبه
يخدعونه اذا من قالوا الشين زين= وانت مالك قلوب الشعب وانته حبيبه
في نفاقٍ وكذب ماخفت للفطين= شان يثروا بنهب الشعب من دون ريبه
الله اللي عطى للشعب كنز دفين = بارضهم ليش مايعطى لكلٍ نصيبه
ليش تشكي الشعوب لفقرها بالونين= وانتم اللي وليتم امرهم بالنهيبه
اكنزوا كل نهب بلا ضمير ودين = من سرق مال شعبه فالله اللي حريبه
يوم يندم ولو هو في مكان حصين= يامر الله شعوبه تنتقم ما تسيبه
الشعب لا تحرك بعد قهر السنين = مثل بركان خامد ينفجر من لهيبه
ومن تهاون بشعبه في ضلاله سجين = بالوهم دوم عايش ماتفكّر مغيبه
اكسبوا للشعوب بعدل مابه ملين = واعطوا الشعب حقه بكل رحبٍ وطيبه
واحرصوا ف اختيار رجال عقلٍ رزين = كل واحد نزيه وما به اللي يعيبه
لا تقولون ذا ولد فلان اصله متين = وذا قريبٍ نعزه ماهو اية جليبه
الكفاءات واجد من شمال ويمين = ومن يجيكم (بواوٍ) فادروا انه هزيبه
اعلنوا للخلايق كل مركز ثمين = ونقوا اللي كفاءه ينتهض به بهيبه
وراقبوا من تنقوا بين حين وحين = ومن تبين فساده فالعقوبه تصيبه
تكسبون الشعوب ولا لحقكم مدين= وتكسبون الرضاء من رب عينه رقيبه

كظيم · 21-10-2011, 08:47 PM

اشهد بالله إنك صادق
في كل حرف وفي وكل كلمـه
قصيده في الصميم

الطائر المهـاجر
صح لسانك وفكرك
ابيـات جزله ووافيــــه
ابدعت في سبكهـا وحبكهـا يابعـــدي
والله المستعــــان
تقبلني وتقبل مروري المتـواضـع لاهنت
ودي وتقديري