" كذب ام العيون " لمحمد بن تويم

[يوسف الشقران]

بسم الله الرحمن الرحيم

من اروع ما قرأت ...

وعلى ذمة الراوي بأنها قيلت في حضور شعراء المحاوره المذكورين فيها

وهي لشاعر المحاوره المبدع

( محمد بن تويم الثبيتي ) رحمه الله


وتبدأ في الحلم ...


"ام العيون الكحيلات"

ليله وانا مرتاح باحلى منامي = جتني طموح النفس سر الغرامي
واوصتني احفض سرها باحترامي = لايسمعن السيدات الاديبات
وتقول انا جيتك من ارض بعيده = اسمع ببو مطلق واحبه واريده
لعلنا نحيا حيات سعيده = ونعج في مستقبل الوقت عجات
قلت اجعلى صدقك يغطي مزوحك = وانا الطبيب اللى يداوي جروحك
مير اخبريني عن حياتك وروحك = بالله من اي النحايا والامات
قالت إيرانيه ومن ديرة ايران "=" جابتني الاقدار من ذيك الاوطان
قلت الغصون تميل والعود ريان "=" ياكثر كذب ام العيون الكحيلات
قالت عراقيه ومن ذيك الاقطار "=" ادرى على ذا الروح من كل غدار
قلت اه ياريم الفلا منك مكار "=" ياكثر كذب ام العيون الكحيلات
قالت تراني من بلاد الشوامي "=" من سوريه قلت اتركي هالكلامي
يبو انهود مثل تفاح شامي "=" ياكثر كذب ام العيون الكحيلات
قالت تراني من هذيك النحيه "=" من ناحية عمان الارض الهنيه
قلت اعتقد مانتي صحيح اردنيه "=" ياكثر كذب ام العيون الكحيلات
قالت تراني من قطر ياثبيتي "=" هات القلم وكتب للك اوصاف بيتي
قلت اختبرناك وعلى الصدق ا بيتي "=" ياكثر كذب ام العيون الكحيلات
قالت خذ الصدق واخذ اقصى الحقيقه "=" من الكويت اللى بلدكم شقيقه
قالت اثر ساعتكم تقدم دقيقه "=" ياكثر كذب ام العيون الكحيلات
قالت خذ اعلومي وسجل خبرها "=" من تونس الخضرا سقى الله ديرها
قلت الثريا لاتغالط قمرها "=" ياكثر كذب ام العيون الكحيلات
قلت نبي نقنع مجيب وسايل "=" من ليبيه ياخي ويش انت قايل
قلت السفاره تبعث النا رسايل "=" ياكثر كذب ام العيون الكحيلات
قالت نبي نقصر لك العلم قصرى "=" اليا بغيت الصدق من شعب مصرى
قلت ابني من الكذب عشرين قصرى "=" ياكثر كذب ام العيون الكحيلات
قالت عسى رب الملا يصلح الشان "=" منشي سحاب الغيث من غر الامزان
لن سلتني ياخي من شعب لبنان "=" ياللى تسب ام العيون الكحيلات
قلت الحذر منكن فرض وسنه "=" ياكم ركبنا الخيل من غير اعنه
يجب علينا الحرص من كيد كنه "=" في وقتنا الحاضر وفي كل الاوقات
امشي على مهلك واناامشي بمهلي "=" ياحلوت الخدين لن سمعوا اهلي
اخاف مايلتف شمللك وشملي "=" قلته وقالت ليتها كان ماجات
حبك كوى قلبي وهشم ضلوعي "=" تناول المنديل مسح دموعي
قلت ابشري مولاك ماهو قطوعي "=" وانا من ارجال تحل المهمات
بكره يبي يخطبك امير بدالي "=" ناصر بن معمر كريم السبالي
قالت صحيح انه عزيز وغالي "=" لكن مامالت له النفس ميلات
قلت امطر خيالك وسيلك نحاوي "=" لاتحسنين الضن في كل غاوي
عبدالعزيز بن معمر غناوي "=" قالت عنه قلبي ضرب له نحيات
قلت الله ينسيك همك وهمي "=" ابالعلا مانع تريه بن عمي
قالت كفو لاكن ماهو بيمي "=" يقولون مانع مايبي الاجنبيات
قلت اتركي ثلثين الاحزان والضيم "=" رضيت للك فضيلة القاضي اغنيم
قالت تراك اتعبتي يابن تويم "=" وانشبتني في خط كله ملفات
قلت الشريف حسين لن جاك ضني "=" راعي هروج مثل هيل وبني
قالت من ايدق الطبول ويغني "=" قلب الشريف يميل نحو الشريفات
قلت ان هداك الله ياعسل ذايب "=" يقولون يحيا شيخ ماهو بخايب
كنه ولد وان كان اريتيه شايب "=" قالت عدلنا عن ملايين وميات
قلت ارقصي فوق الغصن ياحمامه "=" لقيت شفك من رجال الشهامه
ياسين راعي فله بالسلامه "=" قالت علومي عن علومه بعيدات
قلت اه ياضبي عديم الوصايف "=" دنياك يالغالي كما مانت شايف
طلعت تورى فيه والاانت عايف "=" قالت ماسب اهل الشرف والمروات
قلت الشرف مافور والعز ضاف "=" ذكرت لي شخص لبوسه رهاف
اسمه جمال الزمزي يالسناف "=" قالت شربنا الما من الزمزميات
قلت اشكل علومك طوال عراض "=" الغايه ابارضى للك اسراج قاضي
قالت على صرف النضر والتغاضي "=" نمضي لكم باقلامنا عشر مرات
قلت الحميدي لا يفوتك نصيحه "=" لن كان اثر نيتك معنا صحيحه
راعي الصحن في حلته والذبيحه "=" قالت كفو مير العذارى كثيرات
قلت العفو نسيت واليوم ذاكر "=" من راينا نعطيك محمود شاكر
قالت نرد للك الخبر صبح باكر "=" والعين تاشر والسراير خفيات
قلت احسني ضنك وقلبك دليلك "=" عبدالله قصير يبي يستوي للك
واليا استويتي له يسجل جميللك "=" قالت قلوب اهل المحبه سجلات
قلت اثر سوقك مصدر للخساره "=" ماناسبوك موضفين الاداره
قالت شرفنا مايبي عبس جاره "=" لوكيدكم يرجح بكيد الزكيات
قلت ارتضي للك واحد من ازملايه "=" ولكل مشكلت" على الله نهايه
جار الله السواط فييه الكفايه "=" قالت وجع لايسمعن الفتايات
قلت العصيمي من رجال الشكاله "=" اخذيه قالت مافتني جماله
ياخذ له اعصيميت شف باله "=" ماعاشر البدوان غير ابدويات
قلت الجعيد الضاهر انه شفيه "=" ابن طنف راعي العلوم النقيه
قالت دخيللك لاتدله عليه "=" أقر عليه الفاتحه والتحيات
قلت الحلا ضد البلا والمراره "=" عندي للك مريسي سقى الله دياره
قالت عسى عيني ماتشوف داره "=" الحارثي يكفنه الحارثيات
قلت الذويبي عزوته يمدحونه "=" قالت سمعنا به ونسمع لحونه
من دون قاصر فيه ولا مهونه "=" حلفت مانضوي قرايا الذويبات
قلت ارضهم فيها هضاب الغميمي "=" اللى رعى في عشبها كل ريمي
قالت تعلم لك غزال غشيمي "=" عاش بجبل لبنان بين الجنينات
قلت اخبر النا صاحب فب المطافي "=" في الروضه الى دون ربع المصافي
عبدالله اللى قلبه ابيض وصافي "=" قالت عرفنا الفضه من الجنيهات
قلت الحقيقه مابغيت انتفارق "=" حلفت يابعد ان حضنك تصافق
لا عطيك بن شلاح لن كان وافق "=" نبي نصل جده بعد خمس لحضات
قالت يبو سلطان كب المطيري "=" خله يدور له من البيض غيري
قلت التوي يالخاينه بالشجاري "=" وابكي وانا اضحك راحت علومك افوات
ليتك كما ماغابت الشمس غبتي "=" اتعبتي بن تويم ونتي تعبتي
حلفت مانعطيك غير الجبرتي "=" عيشي معه رغم على كل شمات
قالت بليتوني بعود مقفي "=" ماني بلا شفه ولاهو بشفي
تراك لن حطيت كفه بكفي "=" ابانتحر واموت من جيز الاموات
قلت الله يسهل للك بسم ساعه "=" ياكامل الاوصاف وش ذا الدلاعه
توعتني وان كان ماني متاعه "=" قالت نبي حل القضيه بالاثبات
لاعاد يامحمد من اجلي تعني "=" ماريد يابن تويم غير المهنا
عساني اتريح معه واتهنا "=" وارمي همومي في بحور الضلمات
ثم افرحتني حين ماخبرتني "=" ومن الفرح بعد انها بشرتني
شكرتها ماكنها عذبتني "=" وقلت ياروحي تناسي بما فات
ياقايد الغزلان انا اقول طيب "=" لندن عن الطايف بعيد وقريب
يالله تجينا بالصديق المغيب "=" يارب الارض الطاهره والسموات
نبي لنا ياناس حفله كبيره "=" جيبو لنا سلوى وجيبو سميره
ودقو طبول العرس في ذا الجزيره "=" مبروك يابنت من احلى البنيات
ابو فهد عاقل وتستاهلينه "=" وان كان في ماضيك ماتعرفينه
سبحان من سخرك له تعشقينه "=" ياام الثمان البيض وام الشفيات
تمتعو والليل خلوه ليلين "=" وشهر العسل يازين خلوه شهرين
يالله لا فرقت مابين الااثنين "=" ياللى جمعت الشمل في سبع ساعات
ياهل العقول الراسيات الثقال "=" هذي طريقة حلمي اللى جرى لي
مير اسمحولي ياثقات الرجال "=" لن كان في بعض المعاني مطبات
تمت وصلي الله على كامل النور "=" اعداد مامن حي يحج ويزور
واعداد ماخطن الاقلام بسطور "=" واعداد من يقرا الصحف والمجلات

وسلامتكم


ـــــــ

الله الله

ممتع جدا ً

تشدني دائما ً مثـل

هالـ عرائس الشعريه


صح لسان شاعرها

وتسلم يمينك ياابوعيسى


لاهنتـ مليون ....


بس عندي ملاحظه صغيره

وهو خطأ طباعي بلاشك :


نبـي لنـا يانـاس حفلـه كبـيـره "
" جيبو لنـا سلـوى وجيبـو خديجـه
ودقو طبول العرس فـي ذا الجزيـره "
" مبروك يابنـت مـن احلـى البنيـات





إحترامي وتقديري

[يوسف الشقران]

كلامك سليم يالبلاجي هي ( وجابو سميره ) وراح اعدل الخطا

لكن انا نقلتها وعدلت بعض اللي انتبهت له


ـــــــ

تسلم وماتقصر

[ماجد المهدي]

قصيدة جميلة ونقل مميز يا ابو عيسى

صح لسان شاعرها ولا هنت

تحياتي

ماجد المهدي

[مصدر قلق]

بارك الله فيك اخوي يوسف علي نقل

عروس الشعر لابن تويم

[يوسف الشقران]

ماجد المهدي


الف شكر لك ولحضورك





ــــــــــ



مصدر قلق


وانت مصدر ترحيب دائم


الف شكر لمرورك الراقي


ـــــــــــ

[العيناء العامريه]

راااااااااااائعه لبن تويم

مشكوور ياخوي

تحياتي

[محمد بن عبدالله السلمان]

نقل مميز يا ابو عيسى الله يحفظك
ومشكور ولا هنت على جهودك الطيبة
أستاذ لنا جميع دام فضلك

[ابراهيم عبدالحميد]

عظيم الشكر و التقدير للنقل المميز
دمت و سلمت و غنمت

[صعبة المنال]

السلام عليكم ورحمة الله وبركاته


نقل رائع

صعووب