أبوأنس/الشرقي .. والقوافي المشبوهة !!

[الشريف الشرّقي]

أنا والله معكما ولكما وأشعر بحرج عظيم جراء عدم الرد ، ولكنها حالة عقم تنتابني بين الحين والآخر ..من واقع خبرة قد تزول خلال ساعات

لك وللحبيب سناعيس عاطر التحايا .

[الشريف الشرّقي]

قلت سابقا وأقول لاحقا : لو لم نستفد من النت سوى معرفتك يا أبأنس لكفى .. يشهد الله ، ثم إني لازلت أعاني من تلك العلة النفسية التي تحول بيني وبين الكتابة لفترات تطول وتقصر حسب قوة تلك الحالة ومدى تأثيرها على المزاج ، وقد زادت أبياتك الأخيرة من شدة الحالة ( الله يغفر لك بس) لأنني لا أستطيع الرد من جهة ، ولا أملك القدرة على نسيانها والانفكاك من التفكير بها من جهة أخرى والله المستعان ، وقد أتى الفرج من الله هذا اليوم من حيث لا أدري ، فقد أرسل لي أحد الأحبة أبيات أظنها من منقولة تقول :
فتشت أساميهم وأنا ضايق البال // ماغير أنا و ( النوكيا) والرسايل
مافيهم اللي دق ينشد عن الحال // وماني عليهم يشهد الله بعايل
مرٍ أقول المنطقة مابها ارسال // ومر اقول ان البلا بالموبايل
فقلت ( وكان الرجل من ضحايا تلك الشاشة اللعينة ) :
يامانشدنا عنك ياطيب الفال // وياما كتبنا لك بيوت ورسايل
لازال قدرك يابيض الوجه لازال // عالي على خبرك ولاهوب مايل
لكن خذاك اللي خذا كل رجال // بيشة ونادك والمصافي وحايل
فانتبهت انني كتبت !! فقلت الحمد لله كثيرا ، وقمت من فوري متوجها إلى ذلك الركن الذي افتقدته منذ زمن لأعانق حروفك .. سائلا المولى فتحا مبينا :

من المزيون دنياي حرمتني = ودحدر ياسعد حالي ونبضي
أشيل الهم كله فوق متني = ولو شال الجمل ماشلت رَبّضِي
وغيره .. ياسعد منك لفتني = بيوتٍ من ذهب ماهيب فضي
تقول انك على المرقاب تتني = وأقول انك قسم ياخوي بعضي
ولابه شك ياذيب اسعدتني = ولي كلي الشرف باروح وامضي
لدارٍ بالوشم حيل سرقتني = زيارتها على واجب وفرضي

واعذرني على ركاكة ابياتي لصعوبة القافية وضعف اللياقة .

[الشريف الشرّقي]

المشاركة الأصلية كتبت بواسطة سناعيس

يجيك وين يروح لو يقطع البيد=حيثك رفيق له بالأشعار لك سرد

بجيه حيثه شوق وضحىً من الغيد = راعي المهار البيض قطاعة الجرد
ولابه قصور فيك ياسيد السِيد = يابن الرجال اللي لها السيف والفرد
أنتم هل الطالات لا زيد وعبيد = يشهد لكم قاصي عربها مع الكرد
واللي نوى السنعوس ينطح جلاميد = ويكفيك هذا الوصف عن زايد السرد

[ابو أنس]

حي الردود وحي من هو كتب لي=قبله وانا دايم على النت قوّام
اطالع ابواب الشعر دوم ختلي=عساك موجود(ن) بها يابن الاكرام
كان المعرّف ولّع اخضر صفت لي=اعرف جنابك طيّب وعلمكم تام
يوم الهواتف علّقت ما انصفت لي=قلت الفطاحل دارنا دار الاحشام
اعرف بها اخبارك والى من طرت لي=بعض الهواجس والمشاكل والافهام
نثرتها من بوح فكري اهتفت لي=انك تبي تفتل لها حبل وخطام
مانيب انا راعي نقايض وفتلي=مغير احب اللي على الطيب لزّام
لك في ثنايا القلب زرع(ن) وشتلي=اسقيه من مية فؤادي ولا اضام

[الشريف الشرّقي]

مانيب أنا وياك ياخوي عَجلي = أما كتبت اليوم بكتب بعد عام
بس الوكاد انك عزيزٍ وتَجلي = عماس عين اللي له أيام مانام
ليتك تشوف اللي نواظره نِجلي = والله ثم والله ياشيخ تنضام
يازين هرجه يوم مر وهرج لي = ألتغ فرى قلبي بلا رمح وحسام
قالت : (ثلام) وقلت : (ياويه) لجلي = هذا السلام اللي على دين الإسلام ؟ *
يامسهلا حييت لوكنت خَجلي = على السعة بعطيك كرتي والارقام
قالت : فمان الله ياثيخ ثَكلي = معك بجيب العيد والعيد قدام **

* ثلام = سلام ، ياويه = كلمة نسمعها من أبناء البادية أظنها للتعجب أو الاستنكار !
** ياثيخ ثكلي = ياشيخ شكلي .

[سناعيس]

ههههههههههههههه
هذي وش لون تبي تفاهم معها يالثرقي قصدي يالشرقي ان الله كتبها لك ؟
تكفى يابو أنث قصدي أنس حل المعضله وثح لثانك قصدي صح لسانك انت واياه

[ابو أنس]

يابو فهد وش بك على الجرح نكّاش=حي اللحم تسطي عليه وتخزّه
ما فاد به مع القطن زايد الشاش=ولو هو مجبص بالجباير... تطزّه
تروي لنا سيرة عنود(ن) بالاحراش=عجما تحط السين ثاء وتمزّه
وانا اللذي من لثغة الترف منخاش=للرا معه لحن(ن) عجيب يلزّه
احب قولة مرحبا كل ما ناش=صوته لسمعي فز فز القلب فزّه
لو هو قبالي شفت انا الهاتف انعاش=حتى اني اسمع مرحبا واتنزّه
واوصّي اقرانه يقولون له عاش=كوده يكرر مرحبا كل حزّه
يابو فهد لو كانت اللثغه غشاش=تبط كبد اللي سمعها تحزّه
الا انها من بعض الالسن كما كراش*=حلو الطعم يطفي العطش فيه لزّه*

* - كراش مشروب مرطب (مثل الميرندا)
* - لزّه .... فيه استبدال للذاء بزاي وهو من لهجة كثير من المجتمعات العربيه . وقد جرته القافي والضروره

[ابو أنس]

المشاركة الأصلية كتبت بواسطة سناعيس

ههههههههههههههه
هذي وش لون تبي تفاهم معها يالثرقي قصدي يالشرقي ان الله كتبها لك ؟
تكفى يابو أنث قصدي أنس حل المعضله وثح لثانك قصدي صح لسانك انت واياه

وثي ثواتي في الغضي ياثناعيث=لاجا لثانه ما يقيم الحروفي
ان قلت تبغي ثي قال ما بيث=وان قلت هذي مهجتي قال اثوفي
عطني قليبك يمكن اعطيك ترخيث=يمكن الاقي لك مكانن بجوفي
يومن لقيته مقفي وباله مخيث=ثوّت له واقفى يهذّ الكتوفي
قلت التفت ياثيّدي والعن بليث=ثوفك ثعد ويذيل همّي وخوفي
قال اثبر اثبر لاتجيني بتثويث=ثببت لي مثل ارتجاف البلوفي

الفاضل سناعيس ............
لتواجدك نكهه وطعم خاص
يغمرني الكثير من السعادة والأنس برؤية اسمك
واطرب كثيرا لمداخلتك وتواجدك
لك من الشكر وا لااستطيع الوفاء به
ولك عاطر التحايا

[نجم الإبداع]

ياملحمه للود جعلك تدومين = فيك المعارف جاريه مثل الانهار
اجي لها واروح ماتشبع العين=الطيب فيها مثل نفحات الازهار
واقول ماشاء الله عليكم يالاثنين= بحرين بين امواجها يسكن الزار
نظم الجواهر فاق كل القوانين= من فكر راقي معتلي وافي الاشبار

الشريف الشرقي

ابو انس

الله يعطيكم الصحه

تقبلوا مروري
وودي

[ابو أنس]

يامرحبا ترحيبة القلب والعين=للّي الى منّه لفا نوّر الدار
فلاح حنّا بالزياره سعيدين=ومتابعك ياطيب الفال تذكار
هي دعمنا نحطّها بالموازين=لاقالها أستاذ ممن لهم كار

الفاضل فلاح....
كم نأنس ونسعد بمصافحة اسمك ومتابعتك
ونستنير بحكيم رأيك
لك كل الشكر وعاطر التحايا