الجماعـه

[عبدالعزيز ابراهيم المنصور]

يامكثرين الهرج لااسمـع ولااجيـب=تريحوا من فضلكـم واسمحـوا لـي
تريحـوا لاتلحـقـون المشاهـيـب=على الردى ماني شفـوق عجولـي
بالعقل والصبر ادب النفـس تاديـب=والا لهـا مـده تصـول وتجولـي
خلج ترازم فـي سيـاج المحاديـب=مافيهـن اللـي بالعقـال معقـولـي
اشد وطية زور مـن شمـخ النيـب=اليا ضاع مفعو ل الحيـل والحلولـي
انا لاقلـت ارتـب القـول ترتيـب=حتى يجي كـي علـى فـك قولـي
اليا ارسلت لافكار القريحه مناديـب=ترايعن من عقـب ماهـن جفولـي
لكن مالـي مـن وراهـا مكاسيـب=لو كان عشاق القشر صفقـوا لـي
مامستفيـد الا العـدو والاجانـيـب=ولاني مطيـع مقرقعيـن الطبولـي
خليتهـا تعطـي فجـوج مجـاديـب=جرب اتجود فـي رسنهـا مهبولـي
والله لااجنب دام لـي درب تجنيـب=من شرهة حشام الرفاقـه خجولـي
لو انهـا بيـن النحـر والتلابيـب=من الحيا وجهي مهـوب مغسولـي
طبـع لنـا نشـب عليـه ونشيـب=وطبيـعـةٍ لعـلـهـا مـاتـزولـي
على الجماعـه للجماعـه مواجيـب=الا جهلـوا قـدر الرفيـق الهتولـي
ماني على ربعي قريـب محاضيـب=ادنـاة مايخلينـي اسـرج خيولـي
ان جات من طيب شقاها على الطيب=لو انها اعوج مـن رقبـة الذلولـي
وان جات من مسكين منطق واساليب=حطيتهـا بيـن الثـرى والنعولـي
لاحركـت شعـره ولاطلعـت شيـب=ولاضيقت صـدري ولاطـق جولـي
وان كان في صبري على ميلهم عيب=العيب تفتيـش الصـرر والحثولـي
لاقمت تذكر فـي رفيقـك عذاريـب=وتبيـن عيوبـه لذولـي وذولــي
صبرك على ربعك علاج وتطابيـب=يقصـر حبـال السالفـه لاتطولـي
حتى مايلقا فـي طرفهـا مقاضيـب=كـراه خيـر وللمشاكـل ميـولـي
واليا بليت بتايـه شـره وصعيـب=يقول انا العـراف وانـت الجهولـي
قـل الله الله ياحصـان الاطالـيـب=يالفاهـم العالـم عطيـب الفعولـي
هذا الكلام اللي مافي صحتـه ريـب=لانيـب لاحولـك ولانتـا بحـولـي
حصان وبن حصان طيـب مجاذيـب=وبالمعرفـه رجـل محلـي ودولـي
خله يروح يخطي الـدرب ويصيـب=يقول مابالنـاس عرضـي وطولـي
والفرق ماهـو باللحـى والاشانيـب=الفرق بين النـاس فـرق العقولـي
كم واحد تحسن به الظـن ويخيـب=السـن يضحـك والفـواد معلولـي
واللي غدت به كلمـة مالهـا غيـب=ماهو من اطيب ربعي اللي غود لـي
يالله عساها صيحة فـي قفـا ذيـب=وقلع النيـا بينـي وبينـه يحولـي
الرجل مايغصب على الطيب تغصيب=اليا صار ماهو دل ضمـن الدلولـي
ومن عادة اللي طيبه يحضر ويغيـب=لاطالـت الرفقـة زهـوق ملـولـي
واليا بلنـك غبـر الايـام بصحيـب=في مستوى طيبه صعـود ونزولـي
اعرف ترى الدنيا دروس وتجاريـب=والكامـل الله والنـقـا للرسـولـي
لاتصير مشـذاب يقـص العراقيـب=خلـه وراع الاولـه وش يقـولـي
اخذت حكمه مـن كـلام اللواعيـب=للطيـب نـاس وللعـذارى فحولـي

للشاعرالرائع
لافي حمود الغيداني الحربي

[رفيعة الشان]

الله الله رااائعه وتستحق النقل
استمتعت بقرائتها
صح لساان شاعرها
ولااهااان نااقلهاا

[نجم الإبداع]

شكرا على النقل الرائع يامحاكي

وصح لسانك وشاعرها

تحياتي وودي

[عالي مستواها]

محاكي الوووورق ،،،


روعه زادت بروعه أختيارك ،،،



11111111111111لله عليه


صح لسا111111111111نه مليوووون


يعطيك العافيه على هذا النقل المميز ،،،


تسلم إيدك ،،

[زهرة اللوتس]

شكرا لك محاكي
رائع ما نقلته
سلمت
والله يعطيك العافية

تحية طيبة

زهرة

[الطامي]

المنصور
صح السان قائلها
وشكرا لك لنقلها هنا
لاهنت اخي

[عبدالعزيز ابراهيم المنصور]

الرَائِع هُم مُرورُكم

ألف ألف شُكر لكُم

أسعَدنْي حُضُوركم

دُمْتُم بِخَير

سلمت على النقل

قصيده رااائعه

لا هنت

[عبدالعزيز ابراهيم المنصور]

سَلِمْتي

عَلَى الحُضور

وألف ألف شُكر


دُمْتِ بِخَير

[صنداح الزلامى]

محاكي الورق شكرأ لك على النقل الجميل

وصح لسان لافي الغيداني


مثل هذا القصائد لها مستمعين كثر ووجودها في المنتدى


فيادة لمن اراد الفيادة