سمّار

[سمّار]

أرتكا سمّار ليل على شماله=وسِيق له فنجال من صفر الدلالي
ساقه اللي بسمته تحكي قُباله=حيّ لي البسمه وحيّ اللي وحى لي
يوم ما سمّار يتعلل لحاله=ما معه في مجلسه غير الخيالي
قام يرمي في المثايل من خياله=مثل راعي البندقه يرمي المثالي
وإن رمى ؟رمّاي ما يخطي مثاله=لا يروغ ولا يغضّ ولا يَعالي
ما هو مدوّر على مدحٌ وقاله= المدايح فادها والسعر غالي
وإن بغى القاله فلا زالت مجاله=رغم كون القاله فيها ما يقالي
كم يغضّ الطرف عن بعض الجهاله=من ولد عم ورفيق وبَنْي خالي
والله انّه لو بدى بديّة شكاله=غير بعض الناس يجفله الظلالي
كل واحد خابرينه من فعاله= لو يسمّونه بابو زيد الهلالي
ان رميات القفا ماهي رجاله=من رماها ما يَعدّ مع الرجالي
بعضهم لو من يعدد في خصاله = ما يلاقي واحده تسوى ريالي
لانّ موردهم على نقع الضحاله=وانحن اللي وردنا العدّ الزلالي
غير ما هو مشغلٌ باللاش باله=يكفي همومٌ على قلبه ثقالي
ومن غياب اللي تعنّى في وصاله=كنّ وصله بعد غيبه شئ محالي
طفل غار البدر من باذخ دلاله=ما تقول الا خِلق للحسن والي
والدلع من فطرته من حُرّ ماله =ما اصطنعه ولا استلفه مع التوالي
والمعزّه ورث ابوه ومن حلاله=عن جدوده وارثٌ طيب الخلالي
شفت انا مغليه يرسم له كحاله=باليمين ايحسس رموشٌ طوالي
ومن سحر عينيه وإن الشيخ داله=من سواليفه وضحك وهرج حالي
عن جدايله الحراير فكّ شاله=ودار صافي الجيد مركاز الدلالي
وفوق صدره عنّزه خدّه وأماله=يادفا انفاسه على ضلوعٌ نحالي
اذكر الله عدّ ما اتذكر جماله=حسنه ايذكّر بربي ذي الجلالي
وارسَل اشواقه مع نبض الرساله=شوق له غالي وغالي هدّ حالي
ولا ارتكأ سمّار ليل على شماله=سوق له فنجال من صفر الدلالي
يا الذي بسمتْه تحكي عن قُباله=حيّ لي البسمه وحيّ اللي وحى لي

[الطائر المهاجر]

كتبت فأبدعت واجزلت
صح لسانك ولا هنت
تحياتي الطيبة

[صنداح الزلامى]

كتبت فأبدعت واجزلت شاعر جزل
صح لسانك ولا هنت
تحياتي تليق بحضورك الجميل

[داعي الشوق]

صح لسااااااااااانك مليوووووووون يا بو هاشم

شاعر مبدع و قصيدة رائعة و حضور جميل

لله دررررررك

و صح لسانك مدد

ولاهنت

[الـزلـزال]

سمّار

نص مميز ورائع وجميل
من شاعر متميز ورائع في كل مايقدمه لنا
أبدعت وأمتعت شاعرنا
دمت ودام لنا حرفك
صح لسانك ملايين ملايين
ولك فائق تحياتي وتقديري

[منيع]

ياسلام عليك
مبدع ومميز
تسلم اخي الكريم
تحياتي لكم

[الطامي]

سمار
صح السانك ملايين
رائعة جدا
لاهنت اخي

[حي الضمير]

ياسلام ابدعت وامتعت شاعرنا
ومدد صح لسانك

[عمر ال شيبي]

وإن رمى ؟رمّاي ما يخطـي مثالـه
لا يـروغ ولا يغـضّ ولا يَعالـي
حياك حياك
صح لسانك وحي من حياك
لا هنت ابد

[عبدالعزيز العمار]

سمّار

صح لسانك وجاد بيانك

رائع وجزل كالعاده

لاهنت ولاهان راسك

تحياتي لك