ياركبا جمس جديد المسامير ,,,؟؟
ياركبا جمس جديد المسامير= صنع الخواجه والعقول الخبيره
يعجبك سيره في السوي والدعاثير=ويطربك من شكمان صوته هديره
ماله شبيه الا النياق العصافير= لي ساقهن عنتر بوقت الظهيره
بلغ اكتابي يانديب المناعير=لأهل الكرم والمعطيات الكثيره
واحذر تقرب من قليل التدابير=الشاوي اللي مايعشي قصيره
عبد الدراهم ياعلي والدنانير=مكثر عذاريبه وما قل خيره
مطيور مهبولا كثير المحاذير=رخمن قليل في النظر والبصيره
دونك هل الطولات زبن المسايير= اهل الصياني والصحون الكبيره
طلابة العليا وبذالة الخير=حمالة القالات لو هي عسيره
فعالة المعروف يوم المعاذير=لاعضبت عنها اكفوف كثيره
تحملوا فيها جميع المخاسير= يوم النداوي دونها صك بيره
فازت هل الطولات يوم المخاسير= ولا السخاء يوم الرخاوي فشيره
والطير يعقب كل مايعقب الطير= والدار قشري بعد شيخ العشيره
جتك القوافي ياخشيري مناشير= خذها وسلم للنديب الشويره
حبرتها لك بالتواصيف تحبير= والحر يكتب مايريح ضميره