مساء / صباحـ كم شعر
متواضعه .. علها تشفع في طول الغياب
اقبل العيد وانتيْ اْقـْـبلتي اْتْعايدين =بعد ما كنتي ابعد من نجوم السما
بعد غيبه طويله جايه اتهنئين =تحسبيني على جيّتك ميت ظما
طال عمرك ويا جعلك من العايدين=تهنيه خالصه من مسلم لمسلما
وعاد عيدك مهي بمعايدة عاشقين =شاعرك صار لا عاشق ولا ملهما
وقبل ما انتي بكلمة حب تتفوهين =استميحـِـك عذر مزن القريحه هـَمَـا
ارخي السمع وانا عارف ابدا منين =يا اريشة عين مدري يا عذيبة لما
فرحة العيد ما غطت عجاج السنين =مغنم العمر صادر حلمه المَغرما
شوفي الهم طاويني عذاب وأنين =وشوفي الحزن في قلب الشقا وسّـما
فاقد الصبر ماني مثل ما تخبرين =كلَّ شيْ فـيّْ باحضان الهموم ارتما
صارت ايام عمري كلها خطوتين =خطوه ارجع خلاف وخطوه اتقدما
الحياه اللي احسب حربها تستكين=هازمتني وانا ما قلت كيف ولما
بيني وبينها فالمعركه حاجتين=مره ابكي دموع ومره ابكي دما
بس ما فاد لا دمعه ولا دمعتين=شكل همي على موتي حلف واقسما
لو خلق للهموم الـْساناً وشفـَّـتين =كان همي بعالي صوته اتكلما
وانتي ان كان جيتيني غرام وحنين=ربما انـِّـك حسبتيها خطا ربما
لو رميتيني بـْحبـِّـك الى بعد حين =ما رميتي ولكن الله اللي رما
وش تسوي المحبه في فوادي الحزين=دام قلبي ضحك للهم واستسلما
ما كرهتـِـك ويشهد خالق العالمين=عين ما امست تحبـِّـك جعلها بالعما
غير اباقول لـِـك كلمه ولا تزعلين =لو كلامي صريح وقاسي ومولما
قبل ما نفرِح الحساد والعاذلين=وقبل ننسى الاصول ونستبيح الحما
امشي امشي شوي شوي لا تحلمين =وسوي اللي تبينه فالخفوق انما
مستحيل ان قلبي من غرامـك يلين =لو لمستي على شاني نجوم السما
كم لي آعلمك لكن ما تسمعين =ما هو بكل شياً تزرعينه نما
لو زرعتي فوادي في حنانـِـك سنين=ما حصدتي يكون انسان ميت ضما
احمد رده الحارثي