[عمر ال شيبي]

المشاركة الأصلية كتبت بواسطة الطائر المهاجر

يامشتكي ضيم الليالي والايام= كلٍ عليه من الزمن ذيب عاوي
منت الوحيد اللي من الوقت منضام= فاصبر ترى تفرج بأمرٍ سماوي
ولا تشتكي للناس فالناس اقسام= احد يتشفى واخرٍ عنك راوي
ويصير سرك في طريقك كالالغام = لو ما انفجر بك جتك منه البلاوي
ولا تقول ادور ما ينسّيني العام= وتطيح في بيرٍ بعيد الهقاوي
تبحث عن الإقلاع في جو الاوهام= وتصير اسير الكاس تدفع اتاوي
فكم من صميدع جره الكاس بخطام= حتى لقى نفسه من العقل خاوي
وكم هد بيتٍ صاحبه كان لطام= واصبح هو الملطوم من كل واوي
فواجه امورك مثل عنتر ف الإقدام= وحكم لعقلك لاتحكمك شهاوي
وان كان ما تقدر على علاج الاسقام= فدور لسقمك من بعلمه يداوي
وابعد عن مصاحب خسيسين وازلام= واعرف من اللي في حياتك تخاوي
ووقتٍ بلا تنظيم للرجل هدام = فالوقت مثل السيف ماهوب ياوي
لا صرت فاضي جت همومك بالاكوام= فلا تنبطح في البيت مثل الضراوي
اشغل لنفسك خارج البيت حوام= بين الرجال وكل حرٍ نداوي
تكسب علوم رجال تنفعك قدام = وتحميك لا تاقع ببعض النزاوي

صح لسانك در من درر الحكم والنصح