[ناصر عبيد الهواوي]

قم شغّل اللي الى نشته يجي له فزيز=وخذ بي مع الدرب ياعباد مرواس به
وبهر دلالك وخدّر شاهي البنتليز=بجوٍ خلا لاونيسن به ولا ناس به
إلنايف اجباله بصافي سرابه ركيز=مد النظر دامنا يابوي جلاس به
وان كان ودك تسوي علم خله وجيز=كلمة بكلمة تصير الجملة مناسبه
جب نادر القول والمعنى وخل اللزيز=ودقق مثامينها بالآلة الحاسبة
نفّس عليّ حاشرٍ بالصدر جاء له وزيز=من ضيقةٍ توها في خاطري راسبة
وزيز خرطوش فرت إنحل فيه القفيز=انبت سيره وتلّه عندما لاس به
إلعزتي عن غثى الحقران ابا احط بيز=ما يلزم اجلس بمجلس ماني مناسبه
يا شينها لا دهت من صاحبٍ لك عزيز=ما فيه فعلٍ جميل الا وهو كاسبه
ضمن التجارب واحسّبها من اول غزيز=ولا وفّقت للنجاح بصفها راسبه
حللتها بالفصيح ومنطق الإنقليز=ولا معجم الا وكفي جابه وحاس به
ولقيتها هوينة ما كل هذا تعيز=مجلس ذوات. إن حضر شرواي ينحاس به
ولو كنت انا مثل بن لادن وهذا بيريز=عما فعل بأهل غزة ماني محاسبه