[سهيل الشمري]

يمرّ طيفك ويحيي روضة افكاري= ياكلّ الالهام يامشعل طواريقي
لاقمت تنثر عبيرك جيتك اطْياري = وقامت تطوّى غلاتك في معاليقي
من لي زمان ٍ واحسبك عارف وداري = اني اموت بغلاك وناشف ٍ ريقي
تعال حدّ الغلا يفوق معياري = تعال وارجوك تسرع زايد ٍ ضيقي
اموت بك واعشقك والشاهد الباري =اني بحبك امير ٍ للعشاشيقي
مالي بغيرك هوى ولا لك مباري = في كون مغليك لك رفّه وتحليقي
متْسيّدٍ فكري ومتْولّي الطاري = وبْعيني انت المنوّف بالمخاليقي
هذاي في وادي ٍ والفكر لك ساري = واتْخيّلك جنبي اتْخطّ المواثيقي
وانا ارتوي من عيون ٍ سحرها ضاري = ياليت يالروح في هاللحظه تويقي
تشوف منهو هذا بك سرّ واجْهاري = وتْناظر عْيون وجدٍ لك مغاريقي
بالله سالتك تلبّي طلْبة الشاري = اللي بك ارْياض خفّاقه مواريقي
سوق الغلا لي قبل مافضّح اسراري = هدّ الحواجز وحطّم للمغاليقي
اقْبلْ عليّا ولا ترجع لتذكاري = حبي يعوّضْك عن حبّ التّلافيقي
والخاتمه يالغلا والله ما ماري = اني اعيش الهيام اللي لك يليقي