[الخنساء]

المشاركة الأصلية كتبت بواسطة حسن القحطاني

.. أصدق هواوي ..

تركتـك والهـوى .. لانّي أخــافه=أخاف انّي أكون اصدق هـواوي
أنا لا من عشقت .. اعشق كلافه=أسوق الرجل واتْعب هالخطاوي
صغير السّنّ .. تتْـعبـك المســافه=وانا دربي .. طـويل ومانْت قاوي
انا بالعـمْـر .. عــدّيت انتـصــافه=وغصن العمْـر .. بالخبرات راوي
يحبّـك قلبي والنبـض اعــترافه=ولا يخفى عليــك .. الحــال ذاوي
ظهـر حبّـك عليْ .. والكلّ شــافه=ولا ودّي أجـرجـر لك .. بلاوي
عليــك آخـاف من هـرج اللقــافه=وانا ادْري تزْعجـك ذيك الحكـاوي
رقيـق احساس .. مفعم باللطافه=يذوّبك الحكي .. وْطبـعك حيـاوي
وانـا .. قلبي مَعَ عقلي .. خــلافه=أحد صادق معك .. والثـاني غاوي
بياض الصدق .. معْ زُرْقة خرافه=وانا احْساسي مَعَك لونه سماوي
صدوق الحب فرقه .. عن خلافه=مثلْ فـرق المـقـفّي .. والهــلاوي
كتــابي .. ما قـريت الاّ .. غــلافـه=وشعري .. ما وصل حـدّ الهقـاوي
بسـافر .. واتركـك .. واللي أخـافه=أخـاف انّي اكـون .. أكذب هواوي

صح لسانك واعتلا شانك
قصيدة جزلة من شاعر جزل
يترجم روعة الاحساس
وسرنى اكون اول المصافحين
سلمت ودام بوحك