بالدّور ..
بالدّور ياهْمـومي .. على البال بالدّور
لي قلب واحـد .. والزمن ما رحمني
من وين بلقــاها .. ولي قلب مفطـور
من حــظّ عـاثر .. ولاّ هـمّ ٍ قسمني
تكـاثـرت .. واستـسلم القلب مجبـور
هـم ٍ يـروح .. وهـمّ ثـاني استـلمني
آخـر هـمـومي .. روّح قبيـل منصور
بالصـبر قاومتــه .. ولكـن .. هـزمني
سلّمـتـه الخافــق .. ولا قـال مشكـور
بارض الحشـا عاث ومشى ما حشمني
وش حيلتي .. والحظّ له ساق مكسور
لوّ التفت له قـوووم .. ونّ وزهـمني
ولي غصّة ٍ تاقف .. على راس حنجـور
والحزن من طــوله .. بصمته لجمني
ولا من شكيت الهمّ واحسـاسي بالجور
أقـرب قـريـب ٍ .. بالتـأفـف .. رجـمنـي
الناس ماهي ناس .. وارض الوفـا بور
حـتى حبيـبـي .. من ســؤاله حرمـني
يا باحث ٍ عن ســرّي .. السّــرّ مقـبـور
ومهما شرحت الحـال .. محـد ٍ فهمنـي
ماجـور .. ياقلبي على الضيـم ماجـور
والله يســامـح .. من بفعــله ظلـمـنـي