ياعيون اللي بوسط الروض ذاير=والحلا بالعين لا شاحـت نـظـرها
هب نسناس الهواء عقب الهجاير=وشافت فـياض الخلا يومي شجرها
خـوف قـنـاصٍ يـجي للروض زاير=وان لـمـح ريـم الفلا يقطع خبرها
والحـذر بالريـم عن بعـض الدواير=لاجل ماتشرب من الدنيا كدرها
يـنـقـل اللي مضربه بالجوف جاير=وكان صابت صيدته تنثر حمرها
لابغى الـمقـناص ماهاب الخساير=مع مزونٍ يرتـجـي هاطل مطرها
ليـش تـاعـدنـي على دخلة يـنـايـر=وذي ليال ابريل ما وادع شهرها
ارحــم اللي بالهوى شاف النكاير=بـه جـروحٍ عن بـنـي عـمه سترها
يـفـضـحـه فكرٍ بوسط الناس حاير=والعيون اللي شكت لوعة سهرها
لو تعرف اللي بوسط الروح صاير=والجروح اللي وطت حفرة خطرها
كان ماصارت وعـود الـعـشـق داير=ولا رميت الروح في جـمـرة قهرها