زال كل اللي جرى والبعد زال = كل شئ راح حتى الجرح طاب
تدري اني ما ابتعد عنك محال = وتدري اني ماحسب الغيرك احساب
وتدري اني اعشقك حد الهبال = وتدري ان غيرك سراب ٍ في سراب
وتدري اني لكثر الوافين مال = ظنك ابمغليك مابه يوم خاب
وتدري لاهبت تباشير الشمال = تحمل اشواقي مع صفحة كتاب
وداخل الصفحه كتبت البعد طال = وانت أعلنت الفرح والأقتراب
لا يهمك من حكى ولا ويش قال = يكفي اني خذت منك انت الجواب
لا تكثر بالحكاوي والجدال = انت في قلبي وخلفك صك باب
لو ذبحت القلب ذبحك له حلال = لو تقطع عرقه ابمخلب واناب
الهوى يا عاشقي داءٍ عضال = به الم وجراح لكن يستطاب
لذته فاقت حدود الاحتمال = وصار اطيب من طعامي والشراب
ارفق بقلبي حبيبي بالعدال = انت وصلك وصل وغيابك اغياب
لا تكثر بالكلام وبالدلال = يكفي قلبي من عنا الاشواق ذاب
حبك ابقلبي تمكن ثم جال = في شراييني وله وقعٍ مهاب
والشعر في غيركم ماله مجال= ولو كتب للغير يكسوه اكتئاب
حبك ابداخل خفوقي لا يزال = ما يتوب القلب مهما يستتاب