[ناصر عبيد الهواوي]

فرحت باسبوع زل بلاهموم ولا هواجيس=ماقلت وجداه منك ولالفى الخاطر لوافي
ارتحت والحمد لله يوم زالت هالوساويس=ومن قال لي كيف حالك قلت ابشرك امتعافي
وامسيت في روض معشب حسبة الشهرين ما ديس=فيه الزهر يبتسم للشمس والطير امتلافي
بين الجبال الشواهق يطرقه برد النسانيس=غب السحاب المروح ليله امس. الجو صافي
ودربلت وإن الصقور بقمته شقرٍ قرانيس=من طولهن ينقسم عن روسها الغيم امتقافي
اللي براس ايمن الضلعان اظن إنه سناعيس=واللي براس الشمالي يشبه العذب القوافي
ونويت احذف الشبك عله يسوي له لواليس=لكن من ميزة الحر الذكي عجل انحرافي
والشمس غابت وحل الليل في ظلما خراميس=واللي له اسبوع ما شفناه جا اليوم امتلافي
واشعر بنفسي من الماضي بدا يظهر حساحيس=وكان استمرت على هالحال ياربي تكافي
وصرت اتخيل على ملس الحصى نجلٍ نواعيس=ومهار تلع الرقاب وهيف وبطونٍ لطافي
وقررت ارابط على هالروض واقعد بالمتاريس=لو كل شهرين افوز بشيخ اظنه كسب وافي
وين انت ياللي خيول الشعر في إصطبله محابيس=انا خيولي بهالمضمار صايبها خفافي
إن قلت حيعل هلا ياخيل مرني كراديس=ورغم إنهن مكرمات اشوفهن دايم عجافي