[ابو أنس]

بلا مقدمات..........
نص أضعه بعد انقطاع صاغه خيال شاعر ..محاولة لاستمرار تواصلكم المحبب الى قلبي

كلمة (تمون) أحيييه جابت لي البرد=صرت اتنافض والعرق في جبيني
قيلت بنغمه فاتنه مالها حد=واستدركت لك الإذن ياضنيني
لحن(ن) عبر سمعي خذا قلبي بجد=حتى اختصرت الكون بينه وبيني
يومي لمحته وجنته كنها الورد=اذهلت نفسي ثم خارت يديني
قمت ارتشف ريق(ن)نشف وضعي اشتد=عجزت اداري رعشة(ن)تعتريني
هرجه لذيذ وطعمه احلا من الشهد=يازين هرج(ن)لذته تحتويني
كل الحواسي له تجاوب وتشهد=سمعي وذوقي واثبته شوف عيني
نفسي تمادا له وانا ودي ارتد=اخشى عليه وخايف انه يبيني
عقلي وقلبي صايبه جزر(ن)ومد=قلبي غرير وما يحسّب سنيني
وانا اللذي منّه ترى حيلي انهد=وازريت أميز من يساري يميني
محاسنه واجد خطاياه تنعد=واكبر خطاه انه خذ القلب ديني
دين(ن)ولاله من عوض كيف ينرد=ياجيرة الله وان جفتني سنيني

سعد30/2/1430هـ