ياللي تمد ايدك تبي الناس تعطيك=أطلب من اللي في عباده رحومـي
أطلب من اللي لاتضايقت ينجيـك=اللي فرض للناس حـج وصومـي
لـو ماطلبتـه مايخليـك يعطيـك=هو رازق اللي في سماها تحومـي
واللي قسمه الله من الرزق ياتيـك=وماتنال غيره لو تشق الهدومـي
والوقت من غيضه فلابد يسقيـك=ويحدرك من عاليـات الرجومـي
يومٍ صحيب لـك ويـومٍ معاديـك=ونوب تقلّب من بـراد لسمومـي
ونوب الليالي بالمسـرات تغزيـك=الين تدمـج صدقهـا بالحلومـي
وبعد السعاده بالهواجيس تلفيـك=وتعد شهبان السمـا والنجومـي
ولا عن ربوعك وموطنك تجليـك=وتسير جاني عن وطنك محرومي
واسمع نصيحة واحد معه يكفيـك=ان الزمن معطيه رخصه عمومـي
عود القصب يامذتري كيف يذريك=وقت الهبايب يوم شمـلا تقومـي
دور مكـن مذتـري كـود يدفيـك=وخل الهبايب والمعاصيـر تومـي
وكب الخوي اللي مع الناس يخزيك=وترى صديق المصلحه مايدومـي
حط السفاله والرخم تحت رجليـك=ولاتخاوي اهل المنذله والرخومـي
دور خـوي كالنضـر دوم يقديـك=اللي معك تلقـاه وقـت الزومـي
الصاحب اللـي مايوطيـك يعليـك=ولى نخيته لـك يكـف الكمومـي
بس للأسف راح الذي دوم يفديـك=روح وصرت من الصديق معدومي
وقتٍ تبين بـه علامـات تنبيـك=أول علامه صقرها صـار بومـي
انا وحيـد والزمـن قـال مابيـك=والناس لانامت انا شـان نومـي
ياليل قلي وش يرضيك وارضيـك=القلب منك بالرصـاص مختومـي
وين أشتكي ياليل ياليـل بشكيـك=أصبحت ياليل العنا من خصومـي
ياعيـن بالله مايسويـه يرضيـك=ياعين عن نومك طلبناك شومـي