يازينها لاسرت في خايـع الريـع=ماحولك الا صوت بلبل وعصفور
لاوجه فنانـه ولاصـورة مذيـع=ماغير دلة هيل وابريـق محكـور
وحولك نشامـا طيبيـن الاسانيـع=اجواد نسل اجواد ماحولها قصور
شرواك ياعايـد يلبـي المفازيـع=ماانته مهايط حكمتـه للـورا دور
ربعٍ امخاواها شـرف للمجاميـع=سالم من العميان والطرش والعور
فيـه الخزامـا والنفـل والينابيـع=والشوك متشابك مع نبت يمـرور
قفـرٍ خلـي مادوّستـه المناجيـع=توه من الوسمي مروى وممطـور
عليه من ديـم السحايـب تتابيـع=تمسي وتصبح وانت داله ومسرور
الجو طايب والاراضـي مرابيـع=من ريحة الازهار فايح ومعطـور
والنبت ضافي مثل خضر المشاريع=تاقف وتجلس بين جنات وزهـور
تجولها وتصولها ببضـع اسابيـع=والخير واجد من مقانيص وطيور
ساعة صفى لاهب زين الذعاذيـع=اخير من جلسه على دكـة النـور
من يشتري همي وانـا ودي ابيـع=ابيع قلـبٍ كـن يصـلاه دافـور