1 يابـوي ماترحـم قلـوب الحبايـب=حطيت دون العرس قفـل(ن) وبيبـان
2 ورديت عني يوم جونـي القرايـب=ورديت عني عيـال حـارة وجيـران
3 لاجا عريس(ن) قلت ويش انت جايب=نبي عريـس البنـت تاجـر ومليـان
4 مدري تبي يابـوي رجـال شايـب=عود(ن) كبير السـن والعظـم هريـان
5 لاميت(ن) يقبـر ولاهـوب طايـب=وش ينفع الشيبان صبـغ(ن) وريحـان
6 واخاف انا من شي لاصـار غايـب=محدن يلوم النفـس وابليـس شيطـان
7 والاتبـي رجـال شغلـه نهـايـب=همه يجب القرش مـن ويـن ماكـان
8 ولامر عـام(ن) قـال والله غلايـب=هم(ن) وعلقـم ذقتـه اشكـال والـوان
9 بيـن المحاكـم بهذلتنـا الطلايـب=يريـد حقـه كامـل(ن) دون نقصـان
10 ولا تبي يابـوي رجـال خايـب=همـه بلـوت وعقبهـا فـت كنكـان
11 رجل(ن) سفيه وكل ربعه زلايـب=ماقد صحا دايم علـى طـول سكـران
12 يقظي حياته بين شرطـي ونايـب=وانا حياتـي بيـن هـم(ن) وحقـران
13 يابوي انا جنيـت وانـت اسبايـب=ماكن لـي قلـب(ن)ودم(ن) وشريـان
14 الياخطب بنتك عطيب الضرايـب=يابـوي زوجنـي ولانتـاب خسـران
15 في ذا الزمن شفت العجب والعجايب=البنت عند البعـض بيعـت بالاثمـان
16 ان مت حطوا فوق قبري نصايـب=لعـل قبـري صـار للنـاس برهـان
17 وابـي عبـارة تنكتـب بالكتايـب=المهـر حـق البنـت حطـوه عنـوان
18 ومن قال مهر البنت فيه الكسايـب=اقسم بـرب العـرش لاشـك غلطـان
19 وياعل من بـاع البنـي للذهايـب=ياعلهـم بالاخـره وســط نـيـران
20 واللي سمع هرجي ولاهوب تايـب=ابيـه يرجـع يـم سـنـه وقــران
21 وطلبت رب العرش معطي الوهايب=يهدي ويبصر قلب مـن كـان عميـان
22 وصلاة ربي عـد هـب الهبايـب=على النبي المصطفـى نسـل عدنـان

1سمعت انا قولك ونا اليوم تايـب=اي والله اني يا وفا اليـوم ندمـان
2 هذي مصيبه من كبار المصايب=واقع بها يابنت حضر(ن) وبـدوان
3 المجتمع يابنت ماهـوب طايـب=الا ان يثـور بالبلـد كـم بركـان
4 اقولهـا والقلـب يابنـت ذايـب=واطلب من الرحمن يابنت غفـران
5 رايك ترى يابنت لاشك صايـب=اللي يبيع البنـت يبشـر بحقـران
6 لاتحسبيني يوم الـرد القرايـب=او غيرهم يا بنت طامع بالاثمـان
7 ماريد سلتوح(ن) ولاريد عايـب=ماريد زوج(ن) فيه يابنت نقصـان
8 اخاف انا من شخص للناس هايب=وعندك تطول اليد وينبت له اللسان
9 ابي مصلي مايعـرف السبايـب=حنون في بيته وفي السـوق ذيبـان
10 اقولها واجروح قلبي عطايـب=من شن اشوفه ياعرب بعض الحيان