عليك يالله نوكلها على كل صوب=الفكر سبح وجزلات البيوت حضرت
والليل والخيل والمعني وخضر الدروب=والغيمه اللي علي حدب الصحاري سرت
والعز والمجد والتقوى وبيض القلوب=لما طرى سيدي سلطان جات وطرت
سلام ياشيخنا اللي في القلوب محبوب=وكن الشرايين في وسط الدمي بك جرت
وان رحت شرق وشمال وغرب ولا جنوب=من وين سافرت كن اقلوبنا سافرت
غيثٍ وريفٍ ومزبن للعرب في الكروب=وعينك لما نامت عيون العباد سهرت
شمس العطا في يمينك ماكساها الغروب=كم دمعةٍ لك من عيون اليتامي سرت
ولي عهد لعبدالله وسيف حدوب=ودون الوطن خبروا اللي من البشر مادرت
يقود جيش لما ثارت وشبت شبوب=يضرب على روس ناس بالنعيم كفرت
ولياتعزويت ياسلطان وقت الحروب=فابشر بقوم تبيع ارواحها ماشرت
والمدح في وصف مثلك مايجي به عيوب=العيب لو القوافي فيك مافاخرت
يادارنا دام عزك والعدو مغلوب=وتبت يدينٍ نوت بالشر لك وخسرت