الشعر فيض من الخواطر والهجوس = وقصيدتي غيض المشاعر جابها
ما قلتها لجل الهنوف العيطموس = اللي قبل مدة كتبت كتابها
كتبتها من غيض فالصدر محبوس = من حاجة ما كنت أحسب حسابها
الله ولا خوة ضعيفين النفوس = لعل راع الطيب ما يبلى بها
شجرة ودب فجذعها المنخور سوس = والعاقل من الناس ما يشقى بها
لا تخدعك بعض المظاهر واللبوس = ما غشنا فالناس غير ثيابها
تعبت أجامل فالرخوم وفالطفوس = وأقدر لحاها عشان أشنابها
بعض الخلايق ما تحب تكون روس = ترضى تعيش مع العباد أذنابها
ما كل براق تقفاه العسوس = بعض المخايل ما تسيل شعابها
ما أصاحب أصحابي علشان الفلوس = صحبه مثل هذي مقفل بابها
وأعاتب أصحابي على بعض الحسوس = وأقبل من رجال السلوم عتابها
ولولا مواقيف النهار اللي عبوس = وش قيمة الأصحاب عند أصحابها
ومن لا استفاد من التجارب والدروس = يقعد تحت ضرس الليال ونابها