[الطائر المهاجر]

تشوف الرجل يعجبك بكلامه= يبيع الهرج ما يخشى ملامه
والى منك تتبعته لقيته = لطيعي فيه من طبع الفدامه
ولو هو منتمي لاطيب حموله= فلا هو مثل خاله او عمامه
خسيسٍ معدنه لامن سبرته = ولو غطاه تعرف وش طمامه
اذا منه هرج هاجمك قاصد= يظنه مثل عنتر في التحامه
وهو طاووس لو ينفش لريشه= فهو في داخله مثل النعامه
واذا منك كتمته لف هرجه =وبدا ينصحك عن جهل وغشامه
يهايط والمهايط مايردك= على علباه تكويه بصرامه
صحيح اني حليمٍ واتحمّل = ولكن للحلم حد وعلامه
وحلمٍ مع نذل لا من تطاول = عليك يْعود خسران و ندامه
اقدر كل رجلٍ من فعوله = واحطه فوق راسي والعمامه
ولو شفت المضره قلت يمكن= فهمني بالخطا واقبل ملامه
احاول فيه واشرح له كلامي= ولو عانيت من صعب افتهامه
واذا مخطي اشيل الحق وافي= واذا اخطا لقيته بابتسامه
مشاكل كل حرٍ مع رفيقه = صعوبة فهم مغزاه بكلامه
واما النذل لاتعطيه فرصه= يصيد بماء عكر يشفي انتقامه
فلا تليّن ابد للنذل جانب= ترى حلمك يعلّي من مقامه
على راسه بمشعابك تداوي= وهم خلاه عايش في ظلامه
وتركه خير الى من صرت تقدر= فعرفه عار يجلب للملامه