مراسله بيني وبين الشاعر الكبير والاخ العزيز عبد الله المرشدي
امل ان تنال رضاكم
البارحه يالمرشدي قامت تصيح الغافيات = جزّت عليّا مرقدي والليل قضّيته نهيت
مِمّا لهبْ معلوق قلبي من أمورٍ خافيات = يالعْن ابوها طاعنات الشّلْف خلّتني فِتِيت
يالمرشدي جتْك الجروح الداميات الموجعات = بالله عليك اكْشفْ عليها قبْل ماوافي يهِيت
الجرح الأوّل ياعضيدي من حظوظٍ نايمات = عيّتْ تنوّلني مرامٍ بهْ تولّعْت وهويت
والثّاني امْن اجروحي اِعْزوف المزون المقبلات = يوم اوْهلتْ قاعي نِقرْ له هبّ جلاب الحليت
يالمرشدي والثّالثْ اِجْموعي تِولاه الشّتات = من مايلاتٍ لعْن ابو جِدّه مطاعنْها تِمِيت
واللّي قطع قلبي وذبّل للغصون المايلات = واهْفى زروعٍ غطْرفتْ بالقلب (من عيبه خبيت )
اللي غِذاه المكْر والخِدْعه وترديد الشّمات = طبْعهْ وانا احْسبْه القِدا لي لو تعثّرْت وعمِيت
يالمرشدي يامحزمي والقاتلات القاتلات = ماشافت اعْيوني بساحاتٍ بها العالم تِبِيت
مثايلٍ مافوّته بخْصٍ بعسْف الصّافنات = ألْوي عنانه واصْخِرهْ لين أجْني لْطلْع النّبيت
تنثّرت من تايهٍ !!عِلْمه عيوني غافيات = مسكين مايعْرفْ وشْ اللي من دها مكْري جنيت
أفكّكْ الطّلْسمْ ولو هاروت سقّاه الصّفات = والْعبْ على الميّه واطوله في شنبْ شايب سِبيت
واصيب نيشاني ولو هوة من ورا شمْخ السّرات = في دِغْدِغهْ حلّ القرار وليت يفْهم من عنِيت
لعْيون (ساره) ياجزيل القاف شِدّ العاديات = هِزّ الحدبْ واعْرفْك بالفزْعات لكْ علْمٍ وصِيت
زِيزوم ربْعه بالملازمْ لايِقرّ ولا يبات = ذيبٍ اِيلا منّه نِوى يجْعلْ صوالبْها حتِيت
عطْني حلوله ياولدْ مرزوق من قبْل الفوات = أجاملْ العِتْوي أوْ ارْحل يمّ طهرانٍ وهِيت
ورد علي
الشاعر عبد الله المرشدي وقال
طار الكرى والعين مما شفت حاربها المبات=خطٍ لفا من شاعرٍ بالشعر شعره مستميت
فج الضلوع وهيض اشجاني على كيفه وجات =جيته وجاني يوم جا بالطيب يمي جيت جيت
يامرحبا ترحيبةٍ معها الدلال مبهرات=يامرحبا ياسهيل من قلبي ليا منك لفيت
شكواك عندي في برووج عاليات محصنات=اجلها واحلها لو دربها ماقد مشيت
الحظ بالدنيا يدير اكثر علومٍ دايرات=حظك نصيبك مايصيبك شي حاصل لو عديت
الهمه العليا تحطك فوق روس النايفات=والهمه الدنيا قعدت ابها ليا منك رضيت
سدد وقارب للهدف لاتقول ماقد فات فات =اضبط عيارك وانتبه ترمش ليا منك رميت
كل اختبار لو فشل غيره مع الايام يات =كرس جهودك زين واخلص بالعمل لامن سعيت
برقٍ تعدا بالمزون الساريات المردمات=لاتلتفت له لو على وبله تحسرت وبكيت
من صارع الدنيا يشوف الغايبات المبهمات=تبدي لك اللي مختفي وقت الصباح وبالمبيت
جمع بقايا مابقا وارق الرجوم العاليات=شد الحزام ولو بدا حالك من ايامك شتيت
لاتستمع لاهل العقول الصاغرات الخاويات=سكر سموعك عن هروج النذل كنك مادريت
طرد الهروج تحاربه كلّ العقول الراجحات=مافيه فود من الملاسن هج لو فيه ابتليت
وان كان جت للشعر شعرك مايبي جزله ثبات =قافك على هام القصيد الجزل له ساسٍ ثبيت
ابشر بعزك لو عليك تميل من كل الجهات=مادام راسي حي ماتطلب من عيوني عطيت
ترقى جبل ماهتز لو هبت عليه العاتيات =ابشر بعزك يالسنافي لاتعزويت ورقيت
يمناي سيف يفرق صفوف الجموع المركمات =وربعي عتيبه عزوتي لاجا الملاقا واعتزيت
لطامة العايل لهم صيت ورا نهر الفرات= برقا وروق يصخرون الصعب لاقمت ونخيت
عندي وصلت ولاعليك من العلوم الثايرات =اضرب على ماتشتهي وانا على الدرب احتريت
دامك من اللي بالكرم زادو ثمان المعجزات =شمر ينومس ذكرهم وانته من الطيب ارتويت
لعيون ساره واختها سقت البيوت الشاردات = لعيونهن ارمي عقالي واستميت اليا انتخيت