يالله ياللـي سايلـه مـا يخيبـي=يا منفذ أرزاقـه بليـا تحاسيـب
طالبك تغفر لي ذنوبـي وعيبـي=باكر ليا وردت علـي الطواليـب
دنيا فرحها مـن كرهـا قريبـي=هني من لا أشقاه همه عن الغيب
طرايف الدنيا تحضـر وتغيبـي=لو ساعفـت بواقـة للأصاحيـب
صنيتان يا ابني كان لك بان عيبي=إستر علي إن كان فيه عذاريـب
ياما جرى لي في شبابي وشيبـي=من قطعة الفرجة على شمخ النيب
وقحص المهار مشعثرات السبيبي=جراير يشبع بها الطيـر والذيـب
الله ينادي لـي بحـظ ونصيبـي=إخلاف جيش يوم يقفي صواليب
يوم إن هراج السعة يتقـي بـي=عند المواقف يلزمـن المواجيـب
ليا ركبنا أكوارهـن مـا نهيبـي=نبعد حراوي الذم عنا ليـا جيـب
الذم مـا يلقـى علينـا مصيبـي=لا عدت الأفعال بالكره والطيـب
كود الظلايم من ضعاف النصيبي=وإلا فلا للشيـن فينـا مقاضيـب
ياما قطعنا سـرح وإلا عزيبـي=في دبرة المولى وحنـا مناديـب
مع درب شيخ ما يبوق الصحيبي=يشكون منه القوم كفي المحاليـب
يا ليت عصر فات يرجع قريبـي=وإن الصبا يجلب ويغلى ليا جيب
نشريه لـو إنـه علينـا تعيبـي=وإلا نجيبه من ديـار الأجانيـب
على التقى ماله علينـا مصيبـي=ليا ركبنـا سايجـات المحاقيـب
مختـم قولـي بذكـر الحبيبـي=الله يغفرلـي نهـار التحاسيـب