ألفٍ هلا لاجيت وألفين ترحاب = خطوه عزيزه يوم حظرتك لي جيت
ضي الفرح في ناظري ماله غياب = وحزني تبدد غيمته يوم طليت
وعني همومٍ تنجلي مالها حساب = وقلبي من جروحه تشافى وغنيت
انت الدوا وانت الشفا وانت الاطباب = ياللي ليا شفتك تراني تعافيت
انت الامل والظن ابد فيك ماخاب = علقت امالي فيك واقول ياليت
انا بدونك ليلةٍ بدرها غاب = ظلما وحيشه لو بها يشتعل ليت
بين الحنايا العوج ولعت ملهاب = لاضي سناها في الحشا يوم شبيت
يفوح صدري فوحة ادلالٍ اعذاب = رسلانتينٍ فوق جمر الغضى اركيت
ومشاعري باحت لك بلوم وعتاب = وتفجر احساسي على شانك ابطيت
لا ياشقاي وعلتي بعد الاحباب = اللي بنوا بأقصى الضماير لهم بيت
واقول ماشفته مقادير واسباب = من واحدٍ يرجع له الحي والميت