سمعت رعود المخايل وشيف البرق لاح = وانتشأ الخاطر بنوض السحب وارزامها
بكّر الوسمي وعسه نهار السيل طاح = قرمٍ يعشق المراجل وهو غلامها
واكد علوم المطر والحيا لهل الطياح = وشلّعت البدو لبيوتها وخيامها
انتحو يم الحيا وجهوله من صباح = مثل قوم القاهره لوجهت لهرامها
ما حلا سج القدم مع فضا الارض البراح = في رياضٍ تنسي النفس كل آلامها
ما وطاها غير قود القطا جوٍ صحاح = وام سالم جمّلت لعبها بنغامها
ابتهج وجه البسيطه وريح العشب فاح = سرها نفح النواوير عبر انسامها
اشهد ان مشاهد البل للصدر انشراح = شوفها يطرد عن النفس كل اوهامها
زينها لاجات خلفاتها تبرا اللقاح = مع قفار الارض والشاص من قدامها
وارتعت في خايعٍ جا من اقصاه وفساح = تختلط ريحة عبسها وريح خزامها
ذود فارق ما تملكته ايدين الشحاح = اللي اتحب الريالات طال اسقامها
صورةٍ لا شفتها راحت الدنيا سماح = عشقةٍ للنفس يانعنبو من لامها
غنجةٍ فالمشي والزين لابسها وشاح = ومن مواطيها الصغار اعتجل درهامها
ناسعٍ نسنوسها راهية طول وشناح = واوبره برصا ومتعركشة ببرامها
وكبر راسٍ راهي الخد ولحيٍ طفاح = ورقبه سندا ومتهدلٍ خرطامها
والاذاني فهق يمة بعض مثل الجناح = منت شايفها ليا جيت من أمامها
وذيلها شبرين تلفح مثانيه الرياح = منهزع عرقوبها منفهق سنامها
ورث ابا واجداد من يوم زرقات الرماح = منتظر وبالها في حرا سوامها
كم ثنينا دونها في هجاد وفي صباح = وكم عنودٍ لجلها طوّحت بلثامها
هي شهادة جامعية وهي ساس النجاح = وهي معاش النفس وطموحها ودوامها