[الطائر المهاجر]

لا صرت في ديرة والله معطيها = خير كثير وشعب طيب النيه
تلقى الاجانب بها اضعاف اهاليها= متسترين ورا اشباه واويه
والبعض يافد لها هجره لاراضيها= ويزعم بأنه يبي له ارض قدسيه
اما الحقيقه ولا يمكن نداريها= الكل يبغى المكاسب من ورا الجيه
البعض كسبه حلال او حراويها= والبعض كسبه حرام ومخفي طيه
واكبر خطر من يجي يخدم معاديها= ويبدا التسلق وياصل للنداويه
يظهر تخضع ونفسه لو يوطيها= اهدافه اكبر وله نيات مخفيه
والمشكله من فساد ناخر فيها = من وين تمشي تلاقي للحراميه
احد بشيول وضوح لو يخفيها= واحد بطرف ابرة تكشف مراميه
وعجوز جوعانة والفقر واطيها= لو هو رغيف خذت لاطعام ذريه
قالوا حرامية تسجن بداعيها = ويطبق الشرع بالافعال لا النيه
ومهما يكن خير هالديره باراضيها= صارت مثل قربة السقايه ارقيه
تشيلها لبيتهم تعجز توديها= ولا وصلت البيت ما تلقى اثر ميه
وهذي النتيجه وكل اعمى يراعيها= المال محصور في عشرين بالميّة
اما البقيه فدين وقرض معميها = والفقر واطي نفوس شبه منسيه
وبطالة ضاربه والكل داريها = دام الاجانب حشود بكل ناحيه
لابد من وقفة تصحح مجاريها= من قبل ما السيل يجرف كل محميه