[شاكـر محمـد]

مأجور يا قلبي اللي لوّعه شوقه= ثماني سنين لين انه ذبح صبري
في داخله جرح تتجدد به نتوقه=معْ كل ما للجنوب يجول بي فكري
ولاهو بكيفي واحدّ الفكر واعوقه=عن ديرةٍ حبها مدعاة للفخري
عشان له بوصله تهديه وتسوقه = صوب الجنوب المهيب وهو لها يغري
من غير سحر الشموخ ونخوة بروقه=وطيب ناسه وعزف رصاصة الجثري
يسوقه اللي عليه الروح مطفوقه=قد شفت كل الجنوب بوصفه الحصري
ذاك الذي من حلا هرجه ومنطوقه=لاقام ودّه يروّح قلت له بدري
وتستطعم الروح حالي الهرج وتذوقه=اخاف هرجه يفطّرني وأنا مدري
لأجل أني اتلذذ بهرجه وبطروقه=وأقول هات المزيد وهاااه ياعمري
واشرب قراح السوالف عذب والوقه=وأروى وأنا كنت ظامي وينتعش صدري
وكم ذبت مابين حدّ اهدابه وموقه=وكم طحت مغشي عليّ بفمّه الزهري
وفجأه كذا وبطريقه غير مسبوقه =وقع علينا الفراق بصيغة الجبري
وش ذبحة الروح للي نشفت عروقه= ويا كسْر قلبي وسمّ الفقد به يجري
ويا ثقل دمعه تحشرج نفس مخنوقه= ويا ثقل همٍ بتالي الليل بي يسري
أنا اشهد انه معاه الروح موثوقه=أسرف بوصلي وعوّد يسرف بهجري