[الطائر المهاجر]

لامن بغيت تعيش بامن وسلامه=لا تصير راس ولا تكن موقع الذيل
راسٍ بلا اكتاف سهلٍ صرامه = واكتاف ببلا ظهر ما تحتمل شيل
والذيل ملفى ما خبث من قمامه= حتى ولو هو ذيل للذيب والخيل
خلك وسط لو قيل فيك الغشامه = ولو قيل متبلد وبارد وتنبيل
وابعد عن اخبارٍ تثير الندامه = تزعلك ماتدري بها كل تظليل
لانّ السياسه لغز تجهل مرامه = حتى ولو معها شروحٍٍ وتحليل
ما كل ما يعلن بيكشف عتامه = ولا كل ما يفعل بناخذه تدليل
ريح ضميرك لاتزيده ملامه = واعرف تراك بغابةٍ كنها الليل
فيها التجاره جاوزت للعلامه = وتجار حربٍ كسبهم دوم تدبيل
شعارهم يخدع قليل الفهامه=ويركض وراهم لو تعرض لتقتيل
احدٍ يقول الدين يعلي مقامه = وآخر يقول القوم صاروا بتذليل
صار العرب اهل الكرم والشهامه= احجار شطرنجٍ بايدي الاراذيل
وكلٍ شهر للحرب اغلى حسامه= وعلى اخوه اليوم قتلٍ وتنكيل
واللي يشعللها بعراق وشامه= عدو واحد والعرب كالمساطيل
ولو قيل فارس واليهود بخصامه= بالسر اخوانٍ يؤدون تمثيل
المصلحه تجمع نجاد واوبامه= وكلٍ يخادع بالوزن والمكاييل
صار العرب في فتنةٍ مستدامه= ماعاد يطفيها فراتٍ ولا نيل