البدع= هترل
يابو محمد هيض الفكر طاروق =وامسيت اغني به واجر الربابه
للشمس نور وكل مطرود ملحوق =والليل ما يحجب مزون السحابه
ياصاحبي مادام لي قلب وعروق =ونفسٍ مضريها فنون الخطابه
اعشق ويسرقني الوله دوم واتوق =واترجم احساسي حروف وكتابه
يرقا بي المعنى على راس شاهوق =وارفع عمود البيت واركز طنابه
احفظ حقوق اللي لهم عهد وحقوق =وازهد وانومس صاحبي في غيابه
وامدح هل الوقفات والطيب والذوق =ربعي ومنهم بالفعايل تشابه
وان ثارت الهيه لها الراس محلوق =فارس و امثل لابتي في المجابه
اثبت وجودي كل ما ذعذع الشوق =واطلق خيال الفكر اسحم عقابه
مثل السحابه هامتي شامخه فوق =ونهجي على نهج النبي والصحابه
وختامها يالقرم والقول مسبوق =الذيب يدرع لاشجع في الذيابه
وصلاه ربي عد ما لاحت بروق =على النبي خير البشر في ترابه
الرد=فلاح
يامرحبا بالقاف لاجت به طروق=كنه عسل لاسال ماحلى انسكابه
لاقاله القثمي تجي خيله بلوق =حتى حروف الشعر تشكي صبابه
شاعر تناسبني حروف الهوى فوق=ميزان مايختل جزل الوفا به
لكن وش حدك على الفخر والسوق=ماجاك مني يارفيقي طلابه
ونعم بحالك غير لاصرت مزنوق =ماشفت من ربعك ربيب النجابه
ان كان في قصدك تلبسني الطوق=ماني من اللي الخصم يقوى حرابه
عندي بحور الشعر غابي ومطروق=حتى الفصيح وشقرنا لي مهابه
ماكل شاعر لي يجاري وله توق =واللي يجاريني يجيه الف اصابه
وانا على ماقلت ماني بمحروق =لكن وش جابك عساها انطرابه
ان كنت هاوي شعر فابشر على الروق=وابشر عقب هذي بسرع استجابه
احترت بالصاحب يجي راكب النوق=يفخر بنفسه لين شقق ثيابه
هل المطر بديارنا وانبت الفوق=والقاف جاك وجتك معه الاجابه