يا نور عيني و شوق القلب و افراحه = يا غاية الروح حاضرها و ماضيها
يا زهرةٍ في حياة العمر فواحه = يا بهجة ايامي و شمعة لياليها
الروح من غيبتك ماهيب مرتاحه = والعين لذة حلاة النوم جافيها
دايم و حالي مع الهوجاس سواحه = هجسٍ يعوّد بها و هجس يوديها
والوقت يشهر بوجه احلامي سلاحه = على دروب الامل تقصر خطاويها
ما مرني يوم فيه ذقت للراحه = اتعبت روحٍ مناها شوف غاليها
يا حيرة المشتكي من لوعة جراحه = تنزف جروحه ولا يقدر يداويها
ظلام ليله عناء والهم مصباحه = وساعات عمره تسابقها ثوانيها
عن كلمةٍ شامته و عيون لماحه = يخفي ضروفه و دمعاته يداريها
قلبي بسوق الحبايب ضاعت ارباحه = والغايب بغيبته طالت حراويها
على المواليف نار الشوق ذباحه = دنيا غريبه ويا مكثر بلاويها
و ما دام باب الفرج بالصبر مفتاحه = ابطلب الله لا يخيـّب رجاويها
