ياصلاح الشمري علم كبار القلوب =الليالي شرها قام يسبق خيرها
لو بدت شمس الضحى تاليتها للغروب =والبشر تمشي بعكس وعلى تقكيرها
صلاح الشمري
البلا مدري من اهل الحكم والا الشعوب =الوكاد ان العرب بادين تقصيرها
لو من يذنب يحسب خطاه من الذنوب =كان خلق الله ماعاد تعمل غيرها
صنداح الزلامي
والله انا ماحضرنا نعلم بالعيوب =مير طالت والقضيه صعب تفسيرها
انت محسوبن على الكل والعلم ومحسوب =عالج الاوضاع قدام يحدث غيرها
صلاح الشمري
ماكسركم غير عزل الشمال عن الجنوب =كسترتن ماعاد تقدر على تجبيرها
دام نور الشمس يبدي ولاهو بمحجوب =العلل تبغا تعالج بعد تخديرها
صنداح الزلامي
انت ماتكذب ولاكن تسمع للكذوب =الله اكبر والعرب خانها تعبيرها
والله انا نحذف الشوك ونسو الدروب =وانت والعملاق تبون لفة قيرها
صلاح الشمري
اسمعه واكذبه واردعه حتى يتوب =كل نفسن تنردع من بعد تحذيرها
احد في جيده مسد واحد شوكه بالجيوب =شوف حمالة حطب لجل تدهن سيرها
صنداح الزلامي
اصلحوا في شانكم يامنفخت الذروب =لاتهدمون العماير بعد تعميرها
والله انا لو بيغينا نولعا شبوب =مانفكر في كبير العرب وصغيرها
صلاح الشمري
القدر محفوظ والراس بالعز معصوب =نفس تعمل بالوفا يلزمك تقديرها
تجمع الصوان واتحط طوبن فوق طوب =ياموردت الفتن من بعد تصديرها
صنداح الزلامي
لو تخض الماء سنه يالشمالي مايروب =لاتمررها عليه صعب تمريرها
انت راسك ينتفض كل ماهبة هبوب =واقفٍ من دون دارك مغير اديرها
صلاح الشمري
انت رافقت المطيري وخليت الحروب =تحسب ان ام طير تعلفك ويا طيرها
راس مابه خير ماينتفض ويسد نوب =ديرة الاسلام ماهو سهل تنصيرها