اخواني اعضاء منتدى الفطاحلة اقدم لكم هذه القصيدة بعنوان (رحلة ربيع) ارجوا ان تحوز على رضاكم .
يا ماحلا بارض خلا شبة النار=بارض جلد والسيل توه غشاها
وقدة حطب سمر على الكيف نختار= يدفيك عن ريح الشمالى سناها
نوقد هشيمه في ذرى الطور والغار=لا شفت غيم المزن غطى سماها
في الديرة اللي ربعت بعد الامطار=نو الثريا باذن ربي سقاها
والعشب بانت خضرته بين الاشجار=والضلع والريضان عشبه زهاها
منين ما لديت خضره ونوار=بالحسن خلاق الطبيعة كساها
منظر جميل فيه متعة للانظار=كن الطبيعة تبتسم من حلاها
اقضي بها ايام مع الناس دوار=بعيد عن هم الحياة وغثاها
مع خوة كلهم اجاويد واخيار=الخوة اللي عاليا مستواها
ما فيهم المطفوق دوار الاعذار=اللي يموت وحاجته ما قضاها
ولا فيهم اللي لااتصل بالمراه ثار=ويحوس رحلة خوته من رضاها