[ماجد الزيد]

تعال ياوجه الصباح امسيت عنّك الف حول =تعبت من قو الظلام ووحدتي وانت الغياب
والله من تقبل علي امر في كل الفصول =خريف صبر وطلتك نوفمبر وضمك سحاب
حضنك دفا ضو السمر والجو يرسل بالسيول=وعينك بروق وخافقك رعّاد وحسّك انسكاب
لا جيتني والليل موج يداعب الطرف الخجول=شفت الثلاث البيض ماببيني وعينك من حجاب
ونا من الي لا سبر يبصر بعيدات الخيول =ون جيت صاحب في يميني حاتم وراسي عقاب
ماحدني ضلع وعلى روس العوالي قمت اجول =احيان اوردها جمر واحيان اوردها ضباب
والشجْرة الي ظلها فيّا على كل الحقول =ملعون ابو جده يخون عروقه بجوف التراب
اما عطت باثمارها واغصانها والا تزول =الي زرعها شالها والي بغضها ما يهاب
ياهيه ياباني قصر ، ياهيه حاسب لا يطول =ترى الزلازل ممكنة ! والقصر اساساته خراب
ماغنت الورقا طرب يوم اطربت روس الخبول= غنت كذا حتى ينام الليل خادر بالثياب
اكثر صفير البوم حول فياضنا يعجب سلول=واكثر نيام اهل القفار اللي مثل نعق الغراب
التافهين عقولهم ما ميّزت قول الرسول= يلغون به لكنّ ما جاوز حناجرهم كتاب
والا الرعاع يقودهم كاسيت فـ المنبر يقول=يحفظ ويرغي بالحرام انّه مثل طنّ الذباب
يا هيه فتّح واصح لي سود الفتن قامت تغول=الثور والثورة بدايات الزلازل والتباب
طاروا مع العجّة كثير وطاحت اصنام وذيول=مار الذي هالك ظما يطرد ويطرد بالسراب
الثورة الكبرى بعدْها تْقسّمت عرض ٍ وطول=والناصريّة هي سبب الارهاب من شان الكباب
لا بارك الله بالجزيرة يومها تدق الطبول =فرّق تسد هات الدّيوك وفيصل يشبّ الشّباب
إكسب ثقة جمهور أمّة عاطفيّة ما تصول=العب على اوتار المذاهب برمج العقل المصاب
عصمة دم المسلم , حلا ! في فم تكفيري ملول=من قال أنا مسلم عصم دمّة وعرضه والركاب
دامك جهلت المشكلة من وين تلقاها الحلول=خلّك كذا مبرمج مع الإرسال إلى يوم المئاب
الفتنة إنّك تشرب الفتنة ولا تدري جهول =مغموس فيها غمس لين إذنك من عيال الكلاب
قولوا لسعد لندن كفى بلاش نُسحب للمهول =اللي جرى في ليبيا وفي سوريا طشّ النقاب
الي يبي منهم رخا يقبل على الله وينول =والي انمسخ قلبه وعقله يرجي مْن الخلق باب
المشكلة ماهي بظلم الحاكميّة يا مهبول=اطلع على سطح القمر ناظر وش الدنيا / تُجاب !
ناس ٍ ماهم يمّ النّبي والدّين شمسه في أُفول=ماهم كفو تمكين , لا صوفي ولا مدمن شراب
الحاكم الله والبشر ذر وعلى الطفسة تلول=والغالب الأقوى ليا شبّ الظّلم والحق شاب
الأرض يستخلف عليها الله أقوام ٍ عُدول=ولْينصرنَّ الله من ينْصُرْهُ يا أهل الهباب
لوهم خذوا عبرة من التّاريخ ماردّ المغول=ولوهم يميزون البلاءَ مْن العقوبة ما نُصاب
ستة قرون الحال زفت اصحوا وشوفوا وش نقول=أعطوني أيّة طائفة منصورة وخذوا الزّهاب
النصر ماهو كم قتلت وكم ذبحت وكم تغول =النصر كم مسكين بأخلاقك من الإلحاد طاب
أربع طعش عام ودخل دين النّبي كل العقول=بأخلاق أبو بكر وعمر ماهو على قوّ النّصاب
يعني بهمسة فاقد الشّي لا عطاه ولا يحول =واللي تقوله للبشر يرجع لك بنفس العراب
خذ من يهود التّيه عبرة واقع يسبب ذهول=نفس الحوادث مع تغيّر ثوبها ونفس المعاب
تعال ياوجه الصباح وخلّ عنّك هالخبول =قرفت من قو الظلام ولا يشق الليل ناب