[حرف وشعر]

عينى على طعم العنب= فى حمرة الشف الرطيب
شهد النحل فيه انسكب=يغنيك عن طب الطبيب
شوف الجمال وماكسب= يغلا غلا واحلا حبيب
فيك الذرابه والادب= والعقل والراي الصويب
بعض الغلا ماله سبب=والحب ذا شان (ن) عجيب
يوم (ن) تحب اللى تحب= ماعاد فى غيره نصيب
والشوك مايثمر عنب= والخمر من حب الزبيب
واللى هوى لا ماكذب= لا قال ياهول المشيب
والشعر ديوان العرب= قول(ن) يوافقه الاريب
والشعر راس(ن) او ذنب= والنقد يبقى للاديب
وماكل من يكتب كتب= ولا كل من يقرأ لبيب
ولا كل قاف(ن) به طرب= ولا كل طاروق(ن) يطيب
ولا كل رجال (ن) شنب= ولا كل حذاق(ن) يصيب
والنار تشعل بالحطب= مايكفى النار الحظيب
والناس الماس وذهب= والبعض جوهرهم غريب
والكل من طبعه كسب= والكل من اسمه نصيب