( مــــــــــــــــدخــــــــــل )
عز الله أني من هوى البوح مذبوح = الله يعين القلب لا زاد بوحه
يا بوح قلبي من بلا الوقت مجروح = تكفى أبي حظنك يدفي جروحه
أحدن مع أحلامه بنا عالي اصروح = واحدن رسم حلمه وخيله جموحه
ناس ٍ تنام الليل ما عندها اجروح =مرتاح ما عنده هموم ٍ تكوحه
وناس ٍ دموعه فوق خديه مسفوح = محتار ما يقدر يبّن شروحه
يا بوح حالي تشتكي الهم و النوح = محتاج لك يابوح نفسك سموحه
هم ٍ سكن بي ياعرب دوم مشفوح = لزقت ظهر خلا حياتي نزوحه
( في أحد الزملاء أود له احترامي وتقدير )
هاج الضمير اللي له أيام ما هاج=قامت حروفه تصتفق في ضميري
يا بوح لك حب ٍ حفظته بالأدراج=ما يمحي باقي و قدره كبيري
حبك تواصيفه على خير منهاج=نبعه يزيح الهم لوه عسيري
حبك حكم قلبي مثل حكم حجاج=اللي علا صيته شجاع ٍ خبيري
كلما ذكرتك زاد بالقلب و هاج=دمعي على خدي تهامل غزيري
أصبحت مع دربك أنا اليوم دواج=ومن عادتي والله ماحب المسيري
مزن الغلا في داخلي حيل ثجاج=يروي ضما قلب ٍ حداه الزفيري
كتبت لك قصه بها صدق الأخراج=مونتاجها بسمة شفاتك تديري
من بعدكم كني على حامي الصاج=محروم من بعدك حلات السريري
شوقي صعد بي لمك اليوم معراج=عانقتكم بأشواق طفل ٍ صغيري
مابه سواكم داج في خاطري داج=قطفت من حبك زهور و عبيري
حبك علا صيته مثل صيت هداج =أللي ملك بير ٍ صراحة شهيري
أسمك مطعم يبن الأجواد بالعاج=لي الفخر دامك بقلبي مديري
ياكود بحر الحب به عالي أمواج=من جربه يقضي الليالي سهيري
يا بوح لو تبحث لك اليوم مخراج=بين المحاني لو تجول وتطيري
قفلت أنا كل المخارج بمزلاج=وزعت حراس الغلا في ضميري
والله لو تطلب من القلب الأفراج =حكمك مؤبد في حشايا عسيري
هذا غلاكم ثابت ٍ مثل الأبراج=ما ينتهي حتى ألاقي مصيري
من حبكم أمشي على درب الأفلاج=مستاسع الخاطر وحالي بخيري
يا زين جو الحب ما حولك إزعاج=في جوه الهادي صراحة يثيري