[جهاد الشعلان]

السلام عليكم ورحمة الله وبركاته

اعتذر منكم عن الغياب والتقصير لضروفي الخاصه

وهذي قصيّده متواضعه اتمنى ان تشفع لي

الا ياجميلٍ هالني عقْب ما اعترَض = وصوّب خفوقي يوم نشّر ذوايبه
على الهون لاتقفي ترى قلبي احترق = ونفسي بلا لاماك ماهيب طايبه
تجمّل وسايرني عسى فالك الرضى =ويلا من بدى لك لازمٍ جيت جايبه
فلا جيتك ونفسي لها نيّه الردى = ولاجيت لعّابٍ تسوقه لعايبه
فلا شك سوّاق المحبه يسوقني = ومثلك طريق الحب يعرف عجايبه
على روضة العشّاق ناخت مطيتي = وجوّ الغرام امروكماتٍ سحايبه
وشبيت ظوّي حولكم كود تنتبه = وسلهمتلي والرمش صافح هدايبه
به استبشرت روحي وغنّيت بالمثَل = يجي الغيث قطره ثم تلحق صبايبه
فلا تبتلي روحي وتقطع بك الرجا = ترى الروح عن حبك فلا هي بتايبه

جهاد بن عبدالعزيز بن عبدالله الشعلان