[الطائر المهاجر]

علّميهم يا قوافي الشعر معنى "الملهمه" = وكيف تامرني وتكتب ما تبي غصبٍ عليّه
يوم شافت ما تريبه من زمان العولمه = بيّحت شئٍ احسه سبّب جروحٍ نديّه
وارسلت اقسى رساله لكل نفسٍ مسلمه = اللي يحدث يالخليجي مغضبٍ رب البريّه
في خليج الخير جاكم كل عهر الأقلمه = وصارت ديار الأصاله مرتع علومٍ رديّه
كل ساقط في دياره جا يلاحق درهمه = من خبيث البيع يتجر بين صبحٍ أو عشيّه
مستغلٍ من يدوّر شهوته في الرمرمه = دون رادع او ضميرٍ دايمٍ نفسه دنيّه
بين غلمان وجواري وكاس غيّب انجمه = ما حسب للعار لحظه ولا تفكّر في المنيّه
يوم رب البيت انعم بعد جوعٍ وعتمه = واجبٍ شكره وحمده لا التمادي في الخطيّه
لا تقولون السياحه للحضاره ملهمه = اي معنى للسياحه في بلد ما فيه مَيّه
كل شي تستوردون من الخبز حتى لْحمه= وكل بيت فيه سايق او فتاة اجنبيه
ولا تقولون الفنادق كثرها للمزحمه = صارت اكثر من بيوت الناس مِيّه فوق مِيّه
للعهر بنيت وحميت بكل بومٍ ورخمه= والأجانب مستفيده تنزف لدم الرعيّه
ولا تقولوا عن قناوات العهر والجلغمه= دام تنشر للرذيله وش تبوا فيها موليّه
كل طفره لو تطوّل هيلمه في هيلمه = سرع ما تطفي وتغرب مثل شمس المغربيّه
ما حصل للغير حاصل درس لازم نفهمه= ومن كفر بانعام ربّه ينتظر يوم الرزيّه