للتواصل
كيبوردية
يابنت لو لا الحب ماجيت اراضيك = ولا كتبت الشعر فيك ارتجالي
مجنون حبك لو تقولين مابيك = عايش بذكرانا وذيك الليالي
اغليك انا يابنت والله وشاريك = لو قلتي ابعد جيت .. مدري بحالي
اجيك كلّي شوق مابين اياديك = سوّي بقلبي ما بغيتي حيالي
كلّي حلالك هات مرّك وحاليك = اسقيني العلقم وانا آقول حالي
( بصرك ) حياتي وادعي الله يخلّيك = ويحنّ قلبك لي ويرجع لغالي
مشتاق لعيونك وصوتك وانا ادعيك = يومك بقربي مالكه كلّ مالي
ودّي اشوفك حلوتي واندفن فيك = واشوف زولك ياحياتي قبالي
ياللي عيونك تسحر اللي يباريك = ورموش عينك والجفن كالهلالي
وخدودك اللي من حلاها تهنّيك = تفاحتين ن حمر يا همّلالي
والشعر موجه فوق خدّك يحيّيك = ويزيد زينك زين عنق ٍ بدا لي
لا من خجلتي ذاب قلب ٍ يلبّيك = واذوب كلّي بين صدق وخيالي
وان ابتسمتي حبّة الخال تعطيك = احلا وصوف الزين واحلا جمالي
فيك الحلا الوان والرب مهديك = اوصاف حور ٍ من جنا ن ٍ عوالي