[الطائر المهاجر]

رجلٍ بلا ظهرٍ ولا عنده اموال = ولا هو منافق والكذب من حراويه
ونفسه عزيزه ما تدنى للاوحال= يعيش سيرلنكي ولا من يراعيه
في وقت صعب انك تلاقي به رجال= على المبادي اللي تشابه مباديه
صاروا عبيد الفلس والكل يحتال= من شان يجمع لو سرق من يواليه
وصاروا عبيد الجاه والكل يختال= ولو كان خدّامٍ توطّى علابيه
احوال جدت زادت الخلق بخبال= ومن لا يسايرهم فلا احدٍ يدانيه
ياحيسفا يا احفاد شجعان وابطال= وشلون كلٍ تاه محدٍ مقديه
الغرب برمجكم على طرد الاموال= وترك المبادي اللي يراها تعاديه
حتى غديتوا بين شاري ودلال= للي لفظه الغرب ماهوب باغيه
تبون دنيا وجاه من غير افعال = وكل يبيع لضامره مثل اواعيه
كلش تبيعونه لاجل قرش وريال= حتى ولو باع الرجل دين يحميه
ترى الحضاره ماهي شماغ وعقال= ولاهي عماير شاهقه في مبانيه
ولاهي مناصب من وصلها على الحال= يسرق وينهب ما يحسّب لتاليه
حضارةٍ من دون علمٍ للاجيال= كرتون ما اسرع ما يطير الهواء فيه
علمٍ حقيقي بالمعامل له اعمال= ومصانعٍ تلغي المورّد وتنهيه
وتشغّل العاطل فلا فيه بطّال = حتى ولو حرمه بشغلٍ تواليه
تحفظ كرامة من وصل حد الهبال= ماهوب قادر يشتري علاج يشفيه
والبنت للحاجه مشت درب ميّال= وشباب ضايع مالقى من يراعيه
وحنا نوّرد ما نبي بن ودلال= وحتى رغيف الخبز لابد نشريه
ولا من تتبعنا البلى بكل الاحوال= نلقى هوامير الطمع ما تخليه
والا الحكومه زادها الله اجلال= ما قصّرت فالدعم بلحيل ترهيه
بقيادة اللي صار مضرب للامثال= عبدالله الوافي بدربٍ مشى فيه
يحفظه ربي ويرجعه باحسن الحال= فالشعب كل الشعب من قلب يغليه
ويحفظ عضوده من رجاجيلٍ ابطال= درع الوطن نارٍ على من يعاديه