حاله غريبه والأغرب بنت منجنّه

[داعي الشوق]

***********************


ياروح الأبيات هدّي وأكتبي ونّه = من بين حدب الضلوع وبين خفاقي
معقول يعني بعيش العمر منجنّه = ماطاح راسي رضا لعيون عشاقي
أغليه.. واوله عليه بصدق وآحنّه = من ضيق صدري ليا من ضاقت أخلاقي
مشيت لاجله سموم القيظ والكنّه = وقفت مدري وش اللّي قد كسر ساقي
حط القصايد بصدري والبلا بإنه =مجنون شعر وقصيده ماانتهى باقي
يحطب ضلوعي هجوس ويبتعد كنّه = ماشب صدري دفا من لاهب أعماقي
كل السوالف أبيها تنحكي عنّه = مااشوف غيره سكن في داخل أحداقي
أدري المحبه مهي مني ولا منّه = الحب من عند رب الكون خلاّقي
الحب يعني عطا ماتلحقه منّه = تعطي غرامك لقا ماتطلب فراقي
والله مدري غرامه يوصل الجنّه = وإلا فراقه لظى موعود لإحراقي
حاله غريبه والأغرب بنت منجنّه = تكتب قصايد غلا وتشّق الأوراقي,,,,,,,,,,,,,,,,,,,,

من كلمات الشاعرة ( ونــة )