دنياك يابن آدم طريق اتجاهين

[الطائر المهاجر]

دنياك يابن آدم طريق اتجاهين= اخذ وعطا مثلك مثل ساير الناس
واللي يبي ياخذ ولا يسدد الدين = اما اناني او من الفكر بافلاس
ولاّ يشوف انه غدا من السلاطين= وضرسٍ علا والغير من تحته اضراس
وحنا بهذا القصر نمشي بقوانين= الكل متساوي بعدلٍ ومقياس
بغض النظر منهو فلا فيه تخمين= قانون واحد ثابت الركن والساس
لاتقول انا مشهور عندي نياشين = ولا تقول انا مشغول بالفين هوجاس
من لايثمّن ما لقى اي تثمين= يهمل قصيده دام ماعنده احساس
فالشعر حس وذوق قبل الموازين = حتى ولو شعرك بنظراتك الماس
فمن لاشعر بالغير عايش بتكفين = تمثال واقف لو لبس اجمل لباس
هذي الفطاحل وكر حر الشياهين = اللي لهم بالفعل عزه ونبراس
الدرب واضح للرجال الميامين = ومن شاف غيره صايبه بعض الاعماس