ياحــــــــــــلاّق

[سعيد مقبل الأكلبي]

ياحلاّق ياللي عندك المجرفه والموس=تعلّم وقص الروس حتى تجي حلاّق

ولا تاخذك رحمه ليا شفت كُبر الروس=تراها كبار وضارياتٍ على الفِلاّق

فيها مضرب الليور وفيها ضروب الفوس=مخابط مضاربها وساعٍ مثل الانفاق

ولا همّها المشرط ولا شكة الدبّوس=اخذ راحتك واصلخ ومن زعل بالطقاق

هذولا رصاصٍ يحتري ضربة النادوس=يطير ويعير ويحترق في سما الافاق

ولا يانديبي فوق وارد جديد جموس=حفيز الجميحي مابعد فرّه السواق

تلفّه قراطيسه مثل عمّة الهندوس=لا جا عاصبٍ راسه يبي هدّةٍ وخناق

على راس خشمه ودّك انك تبوسه بوس=وترجع تبوس عيونه اللي ماهيب ضواق

لامنه اشتغل لاكنه يقول ميدك دووس=قوي العزم ماله شبيهٍ على الاطلاق

على مركبٍ كنّه مثل سلطنة قابوس=فخامة تسرّ البال وتزيّن الاخلاق

نبي ديرةٍ برّاقها كن فيه كبوس=سرى ليله البارح وهو يصطفق صِفّاق

نجي الارض دايسها المطر طول ليله دوَس=مشاقيق سيله شقّت بطونها شِقّاق

وغدرانها تطفح زلالٍ مهو محيوس=عليها طيور البر من بينهن عناق

وريحة نداها تبهج الخاطر المتعوس=وبارد هواها يشرح الصدر لامن ضاق

بعيدٍ عن الساحل وعن قرصة الناموس=وعن ريحة البترول من بيبه الدفّاق

وعن جوّه اللي لا انكتم كنّه الكابوس=تجي في الريايا ضيقة النفْس والخنّاق

وبعيدٍ عن اللي ماورا صحبته ناموس=ولا بينها والطيب علاقةٍ ووفاق

خويٍ على وقت الرخى محْزمه ممسوس=ولاجيت تبغي تحْتزم به يجيه فتاق

لا قابلْك قام من الطرب يلّعب المنكوس=ولا غبت عنه شوي علّقك في المعّلاق

هذا والله اللي صحبته كلبوها سوس=عسى اللي حفظ راعي الوفا يكشف البواق

وجيه المصالح تتبعك حد معك فلوس=ولا باحت فلوسك يهجّون عنك سباق

تجَمّعهم دروب الطمع لو صحن مكبوس=مشاريع صحبتهم على الطاق والطرباق

ويبقى الوفا والطيب في صاحبه مغْروس=يطول الزمان وراعي الطيب له سبّاق

رِْجالٍ تبادلك الجمايل بطيب نفوس=وشيكات عزٍ في رصيدك ماهيب اوراق

ومن جمّله ربّه وزيّن له الملبوس=يجي في العيون اجمل من الشمس في الاشراق

ومن جا يقوس الناس يصّبر لاجاه القوس=اما تنهكه الاحمال والا يجيه اعتاق
هذي المرجلة ماهيب تحتاج مخْذ دروس=تبي واحدٍ يتعب لها بالقدم والساق

وياحلاّق ياللي قمت تصّرم كبار الروس=قبل لا تقص الروس حوّل على الاعناق

ولاجاك راعي الطيب لاتجرحه بالموس=ترا راسه الطيّب ما يستاهل الدِنّاق