{ وين احلا فيك }>> قصيدة في رهجاء السكر :)

[مبروك بن ماضي]

أحبتي : السلام عليكم ورحمة الله وبركاته
السكر داء العصر وصل عندي بالامس 406 شفاني الله ولا أبتلاكم وحيث ان الموقف يتطلب شي من الفكاهة والراحه النفسية جاءت هذة القصيدة شبه الفكاهية والتي أتمنى ان تحوز على اعجابكم ولاتسوني من دعاءكم 00
وتقبلوا تحياتي ومحبتي





( ويـــن الــحــلا فــيــك )!!!
********************
إليا متى وانـت يالسكـر معيـي تـروح
من جيتني صار لك أكثرمن اربـع سنيـن
***
كنت أحسبك حلو مثل أسمك وطبعك سموح
واثريك غادر وماترحـم ومذهبـك شيـن
***
وين الحلا فيك وانت اللي معاك الجـروح
يبطي شفاها وتسبـب فـي (الغرغريـن)
***
وين الحلا فيك واخطـارك كثيـره تلـوح
وتسبب الضغط والجلطـه واذى الكليتيـن
***
وين الحلا فيك0حل عنـي وفـارق وروح
عز الله انك على صحتـي مانتـه بأميـن
***
قلي تسببت فـي إتـلاف كـم ألـف روح
كم آدمي مـن سبايـب قسٍوتـك ميتيـن
***
مفروض أسميك( بالعلقم) وافضفض وابوح
واهجوك دايم ولا.أفتـكّ مِنّـك إليييـن00
***
00انك تعيد إنتشارك وتعلن ابكل وضـوح
مغادرة جسمي اللي كـان قبلـك سميـن
***
كُبرت عليّه ثيابي / وصار ريحـي يفـوح
بخلطات الاعشاب والحلبـه وبالانسوليـن
***
كل من وصف لي علاجٍ اعتبرته نصـوح
والله وحده هـو الشافـي وهـو المعيـن
***
والحمـد لله بالايمـان يبقـى الطـمـوح
حاضر وتتجـدد الآمـال فـي كـل حيـن
***
والآدمـي بالأمـل يقـدر يشيّـد صـروح
شريطة ألا يظل في سجـن يأسـه رهيـن

**************
أخـوكـم ومحبـكـم / بــن مـاضـي