الداب وشجرته ؟!! مصافحة العوده ..

[ناصر القزلان]

بعد أن تلقيت مكالمه هاتفية من أخي العزيز
وشاعرنا الكبير محمد الفارس , آثرت ان اشارك اسرة ال فارس الكرام افراحهم بهذه
القصيدة الخاصة , وبسبب برنامج الحفل المعد مسبقا لم أنل شرف القائها منبريا
ولكن سنحت لي الفرصة بتقديمها اثناء الامسية التي أعقبت العشاء , انشرها
هنا لمن فاته حضور الامسية ..






هلا بالسحاب اللي تزبر وحن عصير=مع اول نجوم الصيف والريح حاشرته



تقادح سنا برقه تقل بالسماء تفجير=الى طاح وبله بالوطا ثارت غبرته



تحدر من القبله على نجد دار الخير=لوانه تعداها فلاهيب عاذرته



تساوى على اوسطها من المردمه للنير =تهادى لشرق المجمعه قص تذكرته



دخل في صميم المرحله فوق روض سدير=وغنى لها موال والبنت مسهرته



يجر اللحن جر الربابه وهدى السير=عشقها وهي بالعشق تدري وخابرته



نثر فوقها شوق السواني لذيك البير=ولا فيه وادي مابكى من مبادرته



سقاها قراح الماء وفي كفه التبذير=كشف راعي التنجيم لين احترق كرته



سكن وداي الروضه وسجل لنا تقرير=رجع للوراء تاريخ والمجد ذاكرته



على وقت ابن غشام يوم الفخر تسطير=مخاوي نصاب السيف والشعر حنجرته



تميمي عريب الساس ماناشه التطوير=فعايل يديه اللي مع الناس مظهرته



ولا زال له سطوه وخطوه مع التقدير=مدام انها تمشي على الارض باذرته



لنا في محمد راعي الطايله تصوير=ظهر نجمه اللامع وماشفت سطرته



افاخر بابن عمي ولي بالفخر تبشير=لوانه بعيد الدار جيته وزاورته



لو ان الليالي علمتني بفعل الطير=علي الحرام ان كان من قبل دورته



اسوق الركايب لين تاقف على التشهير=والى حل وقت القاف جيته وشاورته



لانه محل الروح والشرح والتفسير=هو الحلم يومني مع الناس فسرته



لعل الحيا في روضة سدير له تعبير=قصايد تميميه ولا هيب عاسرته



بعد سبعة ايام الذواري لها تعطير=الى شمها راع الهوى جاب سامرته



كتب ماكتب فوق الورق للغلا تسطير=جذبها من اقصاها على قد مقدرته



تسامر مع النجمه يبي للسهر تبرير=يكابد هموم ٍ تطعنه وسط خاصرته



شكى ماشكا من لوعة الحب والتقصير=عليه الجفاء من صاحبه دار دايرته



عليه الله اكبر كلما حل له تذكير=على شاشة القلب الخضر لاتصورته



اهل العباير لو لنا بالهوى تغيير=تراجعت عشر سنين عنها وغيرته



تفكرت في دنياي واعياني التفكير=وشاورت عقلي حول وضعي وداورته



لقيت الحلول اصعب من الشعر والتحرير=لاني عشقت الكوكب اللي تخيرته



ولا ينحني راسي ولايقبل التغرير=والى دق ناقوس الخطر ماتكابرته



ولاني من اللي يلتهي في لحوم الغير=مثل واحد ٍ بالليل يرضي بها مرته



والى جيت مجلس فيه نمام مثل عوير=كبير الكلام وطيب الافعال هاجرته



الى اخذت لي فنجال حطيتها توفير=عسى الله يخارجني من الداب وشجرته


http://up.fatahilah.com/up//uploads/b0e9cd90e1.mp3

للتحميل هنا (http://up.fatahilah.com/up//download.php?filename=b0e9cd90 e1.mp3)



التحميـــــــــل (http://up.fatahilah.com/up//download.php?filename=b0e9cd90 e1.mp3)

تقبلوا خالص تحياتي ,,,


ناصر القزلان 19/ 5/ 1430هـ [/align]