وش جنينا من الحضاره غير تخريب البيوت

[الطائر المهاجر]

امام ما يلاحظ من ازدياد نسبة الطلاق في مجتمع دول الخليج العربي
كانت هذه القصيدة التي من رؤيتي الخاصة توضح بعض الأسباب


وش جنينا من الحضاره غير تخريب البيوت= من دشوشٍ او مواقع تنفث السم الدفين
خلت الحرمه تغيّر واصبحت في البيت حوت= لا تساهل رجلها معها يشوف اللي يهين
بعد ما كانت بطوعه ولا نطق لاذت صموت= صار يسكت كود يمنع لدغةٍ فيها اليقين
كل ما تبغاه كوره كلما راقت تشوت = سايق وحارس وحتى تيس لاجاها الحنين
وفوق هذا آلةٍ للصرف تعمل بالرموت= ولو تعذر ويل قلبه صار علك الشامتين
جالسه في البيت اميره ما نقصها إلاّ التخوت= وخادمتها قايمه بالبيت من غسل وعجين
باذنها الجوال لاصق ما عرف لحظة سكوت = كل ما في البيت يجري تلقطه اذن الفطين
ومن قناة اليا قناة وكل فلمٍ ما يفوت = ما تمل من المشاهد لو تصحّي النايمين
ولا قضت للنت تركض مالقت تحسبه توت= تنبسط من رد حصني شاطر بنصب الكمين
تاخذ دروسٍ دخيله تنمحي معها السموت = وينتهي ما قد ورثنا من الجدود الأولين
ضاع حق الرجل حتى من القهر اصبح يموت= كل يومٍ خمس مراتٍ على الوضعٍ المهين
يسكت الرجال ما وده يحرّق للكروت = من وراعينٍ صغارٍ بالقضيّه جاهلين
وتستغل الوضع عبله ترمي النار بزيوت= لين عنتر يجدع لسيفه ويمشي بالملين
ولا بغى يشهر لسيفه معه صكه والثبوت= لاهلها راحت تجرّ عيالها بدمع وأنين
ما تفكر في النتايج كنها تلعب بلوت = وما لقت رجلٍ رشيدٍ باهلها فكره رزين
كل ما قالت يصدق من اكاذيب وبهوت= جاحده عنتر وفعله لو معاها من سنين
يا مره ياكيف عقلك جرّه السانٍ فلوت = طايشه خبله كأنك عايشه من دون دين
للرجل حقٍ كبير وما عطيتيه الفتوت = ارجعي للشرع تدري كان عقلك ما يعين
للصبر حده فخافي قبلما وقتك يفوت= يحرقك باخرى او انه يطردك طردٍ مشين
مالك إلا بيت رجلك فاتركي الفكر الزموت= فيه عزك مع عيالك فيه لك حصنٍ حصين
لا تقولي بيت اهلي ما وراه إلا الغموت = لو يرحب يوم يقلب بالشقاء ماله ضمين
وما تشوفينه بدشك من سوالف ماتقوت= يلعب بعقلك ويكسب من وراه اللي ذهين
ويخدم اهداف المعادي من يخطط في سكوت= كل ما يبغاه شوفك سلعةٍ للطامعين