مدام ان المصافي طاح سهمه مع سهم بيشه

[فواز الغسلان]

الا ياللي جفيت الروح عقب الهجـر وش جابك=مدام ان الـهـوى لـعـــبـة بـلـوت اخترت تـكـويـشه
او انك جاهل(ن)باللي جرى لي عقب مضرابك=او ان العشق عندك صار جلسة شاي مع شيشه
اشوف الفـتـح نـال الـكـسـر والتـشديد باعرابك=وبـالـتسكـين مايـنـجــح ولـو حـاولـت تـغـشـيـشـه
تـعــاف اللـي اليا شـافـك بوسط الناس حيا بك=لـخاطر من هدم قلبك بقصف(ن)جاك من جـيشه
ولا يستغرب العاقل رجى اللي عـاف مشـرابك=مدام ان الـمـصـافـي طـاح سـهـمــه مـع ســهــم بـيــشـه
خـفوقـي طاح برماحك ولاادري ويش سوا بك=واخاف رجـوعـكـم هـذا تـبــي حـــفــره وتـنـبـيـشـه
خفوق(ن)مايـظـن انـه يـطـيـح بـوسـط دولابك=غـــريـر(ن)ماعـرف طــرد الـغــــرام ولا مـبـالـيـشـه
يحسب الجزم هـو مـنـهـج عـهـود الـعـشق بكتابك=وصار الـنـفـي هو لوعـة خفوق(ن)ذاق تـطـنـيـشه
وبوق اللي صدق حـبـه وذاق اطـراف مصلابك=سـواد(ن)مـايـروح الـعــمـر مـع غـسـلـه وتـرويـشه
وانا لو كنت اريد الحسب بان النقص بـحسابك=ولكن وش تـفـيـد انوار بـيـت(ن)فـاصـل(ن)فـيشه
وش المصلوح في تـجـديـد هـرج اللـوم وعـتـابك=وهـجـر الـداب وشـجــرتــه ولا حــفــره وتـنـخـيـشه
مدام انـك جـزمـت الراي والـهـجـران لاحـبـابك=تـرى حـفـظ الـقـدم يـغـنـيـك عن جـرحـه وتـنـقـيشه
قـعد يرجـيـك سبع شهـور وانـتـه قـافـل(ن)بابك=يراجـي من كـفـخ كـفـخـة طيور(ن)لافـح(ن)ريـشه
وانا ماكنت احـسـب انـك تـغـث الروح بغـيابك=وراع الـطـيب مايـفـجـع ولـيـف الـروح في طـيـشه
خدعني بالهوى مدحك لشعر الشوق واعـجـابك=ولاادري وش سـبـب تـغـيـيـر تـفـكـيـرك وتشـويشه
علامك عـبت قلب اللـي بوسط الناس ماعـابك=وصـار الـربــح لـلــخــافـــق عــنـــاه وزود تـهـمـيــشـه
خـفـوق(ن)ذاق نـار الـضـيــم والـحـقران باسبابك=ولا بــانــت بــه الـشـكـوى عـلـى كـثــرة مـطــاريشه
نـسـانـيـس الـهــواء تـسـري بـريـح الـعـطر بـثـيابك=ويـسـري تـــارك(ن)شـغــلــه ولا فــكــر بـتــفــنــيـشـه
يبي شوفك بعـطر الورد عندي تـضـحـك انـيـابـك=لانــه مـكـسب الـخــاطـر وهـي تـالــي مـحــاويـشه
يشوف البدر بـخـدودك وزيـن الـكـحـل باهدابك=وجلد(ن)ناعم(ن)ما بان تـحـت الشمس تـخـديشه
مـراقـيــب الـعــرب عـافـه وصـار بـراس مـرقـــابـك=يـبــي شـوفــة عـنــود الــريــم تـزهــاهـا دشــاديـشـه
يـراقـب شوفـتـك ساعات لو هو تـحـت جـلـبـابك=وراس الـظـبـي مـهـمـا جـعـت لا ترجـي عرامـيشه
ويـعـود لـديـرتـــه يشكـي عـنــاك وجــرح مـخــلابك=فــلا شـافــك ولا هــو بــات فــي نــاعــم مـفـاريشه
ومـهـمــا زاد فـي غـيـظــه وعـاف شـفـاك واطبـابك=اذا شافك يـروح الـغـيـظ من هـجـره وتـطـفـيشه
مع انـه لـو بـغـى يـبـحـث عـيـوبـك راح يـلـقــى بك=وكـل الـنــــاس فـيــهـا عــيـــب لـلــي رام تـفـتـيـشـه
وكـل الـلــي ربــح قـلـبـه طـعــون الـغــدر بـحـرابك=سـهـيـر(ن)يـشـتـكـي غـبـن الـزمـان وقـلـة العـيشه
وتراني عايف(ن)قـصـرك وعـقــب الـيـوم مااهـابك=لأن الـقـلــب ما يـامـن عـشــيــر(ن)رام تـعـطـيـشه
وابــي تـرحـل ولا تـقـــعــد عـلــيـنـا تـفـتــل اشـنـــابك=ونار الشمس عن ذلـي بـجـنـبـك لابس(ن)خـيشه